पाचोरा ( प्रतिनिधी ) – रुग्णवाहिकेचा दुचाकीला कट मारल्याच्या वादातून उदभवलेला वाद सायंकाळी अखेर एकाचा जीव घेतल्यावरच शमल्याच्या घटनेने पाचोरा शहर हादरले आहे . दुपारच्या भांडणाची सायंकाळी खुन्नस काढणाऱ्या गटातील एकाने दुसऱ्या गटातील सहभागी मात्र मूळ वादाशी थेट संबंध नसलेल्या तरुणाला चॉपरने भोसकून ठार मारल्याने तरुणांमधील दादागिरीची मिजास सर्वांनाच विचार करायला लावणारी ठरली आहे .
घटना स्थळाची पाहणी करतांना पोलीस निरीक्षक नजन पाटील, इतर पोलीस अधिकारी.
फिर्यादी सनी देवकर यांच्या गटाचा दुपारी रुग्णवाहिकेचा दुचाकीला कट मारल्याच्या कारणावरून काल दुपारी दुसऱ्या गटाशी वाद झाला होता . त्यावेळी एका रुग्णाला जळगावच्या रुग्णालयात घेऊन जायचे असल्याने आम्ही जळगावहून परत आल्यावर सायंकाळी बोलू असे त्याच्या समोरच्या गटाला सांगितले . सायंकाळी पुन्हा रुग्णवाहिका चालकाने खुन्नस दाखवत दुसऱ्या गटाला बुरहाणी शाळेजवळच्या मैदानात बोलावून घेतले होते . मूळ वाद झालेल्या दोघांनीही आपापल्या मित्रांना तेथे बोलावून घेतले आणि त्यांच्या जबर हाणामारी सुरु झाली या मारहाणीत एका गटातील ४ जण जखमी झाले आणि भूषण शेवरे याला पोटात चॉपरने भोसकण्यात आले . या हल्ल्यात भूषण शेवरे (रा – दुर्गानगर , भडगाव रोड ) या २३ वर्षीय तरुणाचा मृत्यू झाला .
एकलुता एक असलेला मयत भूषण शेवरे हा अभियांत्रिकीचे शिक्षण घेतलेला विद्यार्थी होता . मित्रांच्या मदतीला जावे म्हणून तो या भांडणाच्या ठिकाणी गेला होता . वास्तवात या भांडणही त्याचा थेट संबंध नव्हता . मात्र त्याचा हकनाक बळी गेल्याने शहरात हळहळ व्यक्त होत आहे. आजारपणामुळे भुषणच्या आईचे चार महिन्यांपूर्वीच निधन झाले तो वडिलांसोबत राहत होता .
सनी देवकर यांच्या फिर्यादीनुसार विकी शिंदे , मयूर पाटील , सचिन चौधरी , राहुल पाटील , चेतन पाटील , सागर पाटील , अविनाश पाटील व पवन या आरोपींना पोलिसांनी अटक केली आहे . या गटातील आणखी ३ आरोपी फरार आहेत . अटक केलेल्या आरोपींना आज न्यायालयात हजर करण्यात आले होते त्यांना ५ दिवसांची पोलीस कोठडी न्यायालयाने सुनावली आहे.
