जामनेर तालुक्यात सोयगाव ते शेंदुर्णीदरम्यान घडली घटना, गावात शोककळा
जळगाव ( प्रतिनिधी ) – सोयगाव येथून शेंदुर्णी येथे घरी जात असताना २ दुचाकींच्या झालेल्या भीषण अपघातात २७ वर्षीय व १८ वर्षीय तरुणाचा मृत्यू झाला असून इतर १ जण गंभीर जखमी झाले आहेत. घटनेप्रकरणी पोलीस स्टेशनला नोंद करण्याचे काम सुरू होते.
नचिकेत मनोज जोशी (वय १८, रा.शेंदुर्णी ता.जामनेर) आणि विशाल अशोक गुजर (वय २७, रा. शेंदुर्णी ता. जामनेर) असे मयत तरुणाचे नाव आहे. विशाल हा आईसह शेंदुर्णी गावात राहत होता. खाजगी वाहनांवर चालक म्हणून तो काम करीत परिवाराचा उदरनिर्वाह करीत होता.(केसीएन)तर नचिकेत याचे वडील संगणक दुकान चालवतात तसेच नचिकेत हा राष्ट्रीय स्वयंसेवक संघाचा स्वयंसेवक होता. दरम्यान, मित्रांसोबत विशाल शुक्रवारी सोयगावकडे गेला होता. रात्री घरी शेंदुर्णीकडे परतत असताना शनिवारी दि. ४ ऑक्टोबर रोजी रात्री १२ वाजेच्या सुमारास समोरून येणाऱ्या नचिकेतच्या दुचाकीची जबर धडक बसली.
या धडकेत विशाल गुजर यांच्या सोबत असणारे मित्र गंभीर जखमी झाले. तर नचिकेत व विशाल याला डोक्याला इजा बसल्याने त्यांचा मृत्यू झाला. शासकीय वैद्यकीय महाविद्यालय व रुग्णालय, जळगाव येथे दोघांना दाखल करण्यात आले असता वैद्यकीय अधिकाऱ्यांनी तपासून त्याला मयत घोषित केले. रुग्णालयात कुटुंबीय व मित्र परिवाराने आक्रोश केला. घटनेप्रकरणी शेंदुर्णी गावात शोककळा पसरली असून शनिपेठ पोलीस स्टेशनला प्राथमिक अकस्मात मृत्यूची नोंद करण्यात आली आहे.
