यावल-भुसावळ रस्त्यावरील घटना
यावल (प्रतिनिधी) :- भुसावळ रस्त्यावर यावल शहराच्या बाहेरील पेट्रोल पंपाजवळ भुसावळकडून यावलकडे येत असताना दुचाकीचे टायर फुटले. यामुळे दुचाकी झाडावर आदळून पती जागीच ठार तर, पत्नी गंभीर जखमी झाली. हा अपघात शुक्रवारी सायंकाळी चार वाजता घडला. यावल पोलीस स्टेशनला घटनेची नोंद घेण्याचे काम सुरू होते.
जगदीश वासुदेव अत्तरदे (वय ५३, रा. शिरसाड ता.यावल) व त्यांची पत्नी हेमलता जगदीश अत्तरदे (वय ४५) हे दोघे यावलकडे येत असताना त्यांच्या दुचाकीचे पुढील टायर फुटले आणि भरधाव वेगातील दुचाकी थेट रस्त्याच्या कडेला असलेल्या झाडावर जाऊन धडकली. या अपघातात अत्तरदे यांचे डोके झाडावर आदळले गेल्याने जबर दुखापत होऊन ते जागीच ठार झाले. तर त्यांची पत्नी ही गंभीर जखमी झाली.
अपघाताची माहिती मिळताच शहरात असलेले आमदार शिरीष चौधरी, आदी नागरिक घटनास्थळी दाखल झाले व पोलिसांना माहिती देण्यात आली. वाहतूक विभागाचे हवलदार अर्शद गवळी, सहायक फौजदार असलम खान यांनी जखमी महिलेला तातडीने तेथून यावल ग्रामीण रुग्णालयात आणले. तर मृतदेह विकास पाटील यांच्या वाहनातून यावल रुग्णालयात आणण्यात आला. अपघाताची माहिती साकळी व शिरसाड गावात मिळताच यावल ग्रामीण रुग्णालयात माजी सदस्य गोटू साळुंके सह साकळी व शिरसाड गावातील नागरिकांनी रुग्णालयात गर्दी केली होती. तर हेमलता अत्तरदे या बेशुद्ध होत्या. त्यांच्यावर प्रथमोपचार करून त्यांना तातडीने जळगाव जिल्हा शासकीय वैद्यकीय महाविद्यालयाच्या रुग्णालयात हलवण्यात आले आहे. त्यांची प्रकृती गंभीर आहे.
