जळगाव तालुक्यातील उमाळे फाट्याजवळची घटना
जळगाव (प्रतिनिधी) :- उमाळे फाट्याजवळील वळणावर नियंत्रण सुटून दुचाकी घसरल्याने तालुक्यातील देव्हारीतील तरुणाचा मृत्यू झाला तर मित्र गंभीर जखमी झाल्याची घटना शुक्रवार १० रोजी सायंकाळी साडेसहा वाजता घडली. याबाबत एमआयडीसी पोलिसात अकस्मात मृत्यूची नोंद करण्यात आली.
विशाल राजेंद्र सपकाळे (२१, देव्हारी, ता.जळगाव) असे मयत तरुणाचे नाव आहे. विशाल हा तरुण आई-वडील व मोठा भाऊ यांच्यासह वास्तव्याला आहे. तो एमआयडीसीतील सिद्धार्थ केमिकल कंपनीत वेल्डर म्हणून कामाला होता. शुक्रवारी सायंकाळी विशाल सपकाळे हा त्याचा मित्र विशाल गुळवे यांच्यासोबत दुचाकी (एम.एच१९ – ५६१३) ने कंपनीतून देव्हारी येथे घरी जाण्यासाठी निघाले होते.
तालुक्यातील उमाळे फाट्याजवळील वळणावर त्यांची दुचाकी घसरली. यातील विशाल सपकाळे यांच्या डोक्याला गंभीर दुखापत झाल्याने त्याचा जागीच मृत्यू झाला तर त्याच्यासोबत असलेला विशाल गुळवे हा गंभीर जखमी झाला. त्याला खाजगी रुग्णालयात उपचारार्थ दाखल करण्यात आले आहे. या घटनेबाबत एमआयडीसी पोलिसात नोंद करण्यात आली. मयत विशाल सपकाळेच्या पश्चात वडील राजेंद्र गोविंदा सपकाळे, आई मीराबाई मोठा भाऊ निखील व विवाहित बहिण असा परिवार आहे.
