भडगाव शहरातील घटना
भडगाव (प्रतिनिधी) :- शहरातील विद्यानगर येथील चाळीसगाव रोडवरील घराच्या जिन्यामधील लोखंडी दरवाजाचे कुलूप तोडून अज्ञात चोरट्यांनी सुमारे २ लाख १९ हजार ४०० रुपयांचा मुद्देमाल चोरून नेल्याची घटना दि. १२ डिसेंबर रोजी सायंकाळी उघडकीस आली आहे. याबाबत भडगांव पोलीस स्टेशनला चोरीचा गुन्हा दाखल करण्यात आला आहे.
शहरातील डॉ. प्रकाश दत्तात्रय भोसले यांचे घरी हि चोरी झाली आहे. डॉ. भोसले यांच्या घरी सायंकाळी ५:३० वाजतापर्यंत घरी कोणीही नव्हते. ते घरी परतले असता त्यांना चोरी झाल्याचे समजले. त्यांनी पोलिसांना कळवले. पोलिसांनी घटनास्थळी जाऊन चौकशी केली. चोरट्यांनी घराच्या जिन्यामधील लोखंडी दरवाजाचे कुलूप तोडून घरात प्रवेश करीत घरातील सोने, दागिने,रोख रक्कम,घड्याळ असे एकुण २ लाख १९ हजार ४०० रुपयांचा मुद्देमाल चोरीस गेले आहे.
घटनास्थळी श्वान पथक दाखल झाले असुन ठसे पथकही सोबत होते. घरामागील असलेले एका गॅरेज दुकानातील सीसीटीव्ही कॅमेऱ्यात सदर चोरटे पळ काढतांना दिसून आले आहेत. अज्ञात चोरट्यांविरुद्ध फिर्यादी डॉ. प्रकाश भोसले यांच्या फिर्यादीवरून भडगाव पोलीस स्टेशनला गुन्हा दाखल करण्यात आला आहे. पुढील तपास पोलिस उपनिरीक्षक शेखर डोमाळे हे करीत आहे.
