यावल शहरातील घटना
यावल (प्रतिनिधी) : शहरातील रेणुकादेवी मंदीर परिसरात राहणाऱ्या एका ४५ वर्षीय दिव्यांग तरूणाने गळफास घेत आत्महत्या केल्याची घटना उघडकीस आली असुन पोलीस ठाण्यात या घटनेची नोंद करण्यात आली आहे. दरम्यान गळफास घेत आत्महत्या केलेल्या अपंग तरुणाबाबत माहिती न देता त्याच्या मृतदेहाचा अंत्यविधी होण्याआधीच पोलीसांनी स्मशानभुमीत जावुन तरुणाचा अंत्यविधी थांबविला व प्रेतास यावल ग्रामीण रुग्णालयात आणण्यात आले.
शहरातील रेणुकादेवी मंदीर जवळच्या परिसरात राहणारा बाळू लक्ष्मण वाणी (वय ४५) दिव्यांग तरूणाने २५ मार्च सोमवार रोजी रात्री ११ वाजेच्या सुमारास आपल्या राहत्या घरात गळफास घेत आत्महत्याकेली. निलेश नारायण वाणी यांनी यावल पोलिस ठाण्यात खबर दिल्याने अकस्मात मृत्युची नोंद करण्यात आली आहे. तपास पोलीस निरिक्षक प्रदीप ठाकुर यांच्या मार्गदर्शनाखाली पोलिस उपनिरिक्षक सुनिल मोरे व पोलीस तपास करीत आहे. यावलच्या ग्रामीण रूग्णालयात मयत बाळु वाणी याच्या मृतदेहाचे शवविच्छेदन करण्यात आले आहे. दिव्यांग तरुण बाळु वाणी हा ८५ वर्षाच्या वयोवृद्ध आई सोबत रेणुकादेवी मंदीर परिसरात राहात होता. त्याने अचानक केलेल्या आत्महत्यामुळे परिसरात खळबळ उडाली आहे.