अमळनेर शहरातील स्टेशन रोडवरील घटना
अमळनेर (प्रतिनिधी) : गेल्या काही दिवसांपासून शहर व तालुक्यात संततधार पाऊस सुरू असून स्टेशन रोडवर एका दिव्यांग व निवृत्त मिल कामगार असलेल्या ज्येष्ठ नागरिकांचे घर कोसळल्याने त्यांच्यासमोर मोठे संकट उभे राहिले आहे. सुदैवाने वेळीच ही घटना त्यांच्या निदर्शनास आल्याने मोठी दुर्घटना टळली. शासनाकडून नुकसान भरपाईची मागणी नागरिकांकडून करण्यात आली आहे.
स्टेशन रोडवर निवृत्त कामगार रमाकांत नामदेव शिंदे यांचे रस्त्यालगत घर असून ४ रोजी दिवसभर पावसाची रिपरिप सुरू होती. रात्री १० वाजेच्या सुमारास अचानक त्यांच्या मागच्या घराचा स्लॅब कोसळून घर जमीनदोस्त झाले. यात घरातील साहित्य दाबल्याने खराब झाले. त्यांच्या घरात त्यांचा मुलगा व सून आणि लहान मुलेही राहतात. सुदैवाने घटनेच्या वेळी ते घरात कुणीही नसल्याने अनर्थ टळला.
शेजारील लोकांनी तातडीने मदतकार्य केले. या घटनेची माहिती माजी नगराध्यक्षा जयश्री पाटील यांना दिल्यानंतर त्यांनी महसूल प्रशासनास पंचनामा करण्याच्या सूचना केल्याने सकाळी पंचनामा करण्यात आला. या घटनेत या कुटुंबाचे मोठे आर्थिक नुकसान झाल्याने त्यांना शासनाकडून तातडीने अर्थिक मदत मिळावी, अशी मागणी नागरिकांनी केली आहे.
