चोपडा शहरातील गौतम नगर येथील घटना
चोपडा (प्रतिनिधी) :- शहरातील गजबजलेल्या गौतमनगर भागात बुधवारी सायंकाळी ७ वाजेच्या सुमारास पायी फिरणाऱ्या महिलेच्या गळ्यातील सोन्याची पोत धूम स्टाइलने समोरून पल्सर मोटारसायकलने येत २ तरुणांनी लांबवल्याची घटना घडली आहे. याप्रकरणी चोपडा शहर पोलीस स्टेशनला गुन्हा दाखल करण्यात आला आहे.
आशा प्रल्हाद बिन्हाडे (५४) या दि. १६ रोजी सायंकाळी ७ वाजेच्या सुमारास शहरातील गौतमनगर भागातील रस्त्यावरून फिरण्यास जात असताना समोरून अचानक वेगात विना नंबर प्लेटची दुचाकी आली.(केसीएन)त्यावर तोंड बांधून बसलेल्या युवकांनी बि-हाडे यांच्या गळ्यातील १७ ग्रॅम वजनाची सोन्याची मंगल पोत तोडून धूम स्टाइलने पोबारा केला.
दोघेही चोरटे तरुण हे २५ ते ३० वयोगटातील असावेत, असा अंदाज आहे. महिलेने आरडाओरड करण्याचा प्रयत्न केला. मात्र तोपर्यंत आरोपी दिसेनासे झाले होते.आशा प्रल्हाद बि-हाडे यांनी दिलेल्या फिर्यादीवरून चोपडा शहर पोलिस स्टेशनला अज्ञात आरोपींविरुद्ध गुन्हा दाखल करण्यात आला आहे.
