शारदा बागुल यांना न्याय मिळण्याची पोलिसांकडे मागणी
भडगाव ( प्रतिनिधी ) –भडगाव येथील माहेर असलेल्या शारदा बागुल या भगिनीचा धुळे येथे पतीकडून अमानुष छळ करून खून करण्यात आला होता. यात मांत्रिकाचा वापर करून जादूटोणा करण्याचाही प्रयत्न झाला. म्हणून महाराष्ट्र अंधश्रद्धा निर्मूलन समिती भडगाव शाखेने आज भडगाव पोलीस स्टेशनचे पोलीस निरीक्षक पांडुरंग पवार यांना निवेदन दिले. दोषींवर जादूटोणाविरोधी कायद्यांतर्गत कठोर कारवाई करण्याची मागणी या निवेदनात करण्यात आली आहे.
अंधश्रद्धा निर्मूलन समितीच्या अथक प्रयत्नांमुळेच हा कायदा मंजूर झाला असून, समाजात मांत्रिकांच्या मदतीने करणी करून एखाद्याला ठार मारणे किंवा भानामतीसारखे प्रकार अस्तित्वात नसतात, याबाबत अनिस सातत्याने प्रबोधन करत आहे. ‘करणी’च्या नावाखाली एखाद्याला ठार मारणे हा जादूटोणाविरोधी कायद्यांतर्गत गुन्हा असल्याचे समितीने निवेदनात म्हटले आहे.
याप्रसंगी समितीचे कार्यकर्ते युनुस खान, सुबोध पाटील, डॉ. अतुल देशमुख, डॉ. अविनाश भंगाळे, नागेश वाघ, डॉ. विलास पाटील, फिरोज, इम्रान अली सय्यद, योजना पाटील, डी.डी. पाटील उपस्थित होते. तसेच, प्रा. दीपक मराठे आणि योगेश शिंपी यांचे मार्गदर्शन लाभले.
