रावेर तालुक्यातील अजंदे येथील घटना
रावेर (प्रतिनिधी) :- धावत्या कामायनी एक्सप्रेसमधून पडल्याने दोन तरूणांचा मृत्यू झाल्याची धक्कादायक घटना शनिवारी २ डिसेंबर रोजी घडल्याचे उघड झाले आहे. याप्रकरणी रेल्वे पोलिसांनी ग्रामीण रुग्णालयात दोघांचे मृतदेह रवाना केले होते. तर रावेर पोलीस स्टेशनला घटनेची नोंद घेण्याचे काम सुरु होते.
मुंबईकडे जाणार्‍या वाराणसी-मुंबई लोकमान्य टिळक टर्मीनस कामायनी एक्सप्रेसने रावेर स्टेशन सोडल्यावर त्यातील दोन तरूण खाली पडले. त्यांना गंभीर मार लागल्याने त्यांचा मृत्यू झाला. हे दोन्ही तरूण एक्सप्रेसमधील बोगीच्या दरवाज्याच्या जवळ बसलेले होते. त्यांचा तोल गेल्याने खाली पडून त्यांचा जागीच मृत्यू झाल्याची माहिती पोलिसांतर्फे देण्यात दिली आहे. हा अपघात रावेर रेल्वे स्थानकापासून जवळच असलेल्या अजंदे गावाच्या रेल्वे बोगद्याजवळ झाला.
दोन्ही मयत तरूणांची नावे मोनू मंडल आणि आकाश वैद्य असल्याची माहिती मिळत आहे. ते खंडवा येथून कामयानी एक्सप्रेसने भुसावळला जात असल्याची माहिती मिळाली. हे तरूण संगीत पथकात वादक म्हणून काम करत होते. भुसावळला कार्यक्रमासाठी जात असतांना दुर्घटनेत या तरूणांना प्राण गमवावे लागले आहेत. या प्रकरणी रावेर पोलिसांत घटनेची नोंद घेण्याचे काम सुरू होते. तर, या दोन्ही तरूणांचे मृतदेह हे शवविच्छेदनासाठी पाठविण्यात आले आहेत.
