जळगाव तालुक्यातील भादली रेल्वेलाईनवरील घटना
जळगाव (प्रतिनिधी) :- युपीकडे रेल्वेने निघालेल्या तरुणाचा रेल्वेतून पडल्याने मृत्यू झाल्याची घटना मंगळवार, १२ डिसेंबर रोजी सायंकाळी साडेसहा वाजेच्या सुमारास जळगाव ते भादली अप रेल्वेलाईनवर घडली आहे. याप्रकरणी नशिराबाद पोलिसात अकस्मात मृत्यूची नोंद करण्यात आली आहे.
विशाल राजेशकुमार यादव (२१, रा.सिध्दार्थ नगर, उत्तरप्रदेश) असे मयत तरुणाचे नाव आहे. विशाल यादव हा तरूण नोकरीनिमित्त गेल्या चार वर्षापासून मुंबईला वास्तव्याला होता. मंगळवार, १२ डिसेंबर रोजी सकाळी तो उत्तरप्रदेश येथे गावी जाण्यासाठी रेल्वेने प्रवास करीत होता. सायंकाळी साडेसहा वाजेच्या सुमारास रेल्वे ही जळगाव ते भादली दरम्यान धावत असतांना अप रेल्वे लाईनवरील खंबा क्रमांक ४२८ जवळ त्याचा तोल जावून खाली पडला. त्यात तो गंभीर जखमी होवून जागीच मृत्यू झाला.
ही घटना घडल्यानंतर स्टेशन मास्तर यांनी घटनेची माहिती दिली. नशिराबाद पोलिस ठाण्याचे पोलीस कर्मचारी यांनी घटनास्थळी धाव घेवून मृतदेहाचा पंचनामा केला. आधार कार्डच्या आधारे मयत तरुणाची ओळख पटली. मृतदेह शासकीय वैद्यकीय महाविद्यालय व रुग्णालयात नेण्यात आला. याप्रकरणी नशिराबाद पोलिसात अकस्मात मृत्यूची नोंद करण्यात आली. पुढील तपास हवालदार अतुल महाजन हे करीत आहे.
