पालकमंत्री गुलाबराव पाटील यांचे आदिवासी समाजाच्या मेळाव्यात प्रतिपादन
धरणगाव (प्रतिनिधी) : आदिवासी समाजाचा खऱ्या अर्थाने विकास करण्यासाठी आदिवासी बांधवांनी शिक्षणाला महत्व दिले पाहिजे. भविष्यातही एकही आदिवासी लाभार्थी घरकुलाच्या लाभापासून वंचित राहणार नसल्याची ग्वाही देवून आदिवासी समाजाच्या सर्वांगीण विकासासाठी वचनबद्ध आहे. मंजूर १० कोटी निधीतून मतदारसंघातील ५१ गावांतील आदिवासी वस्त्यांवर सौर दिवे बसविले जाणार असून, माझ्यासह शासन आपल्या पाठीशी खंबीरपणे उभे आहे, असा विश्वास व्यक्त करून धरणगावात तालुक्यातील आदिवासी बांधवांसाठी भव्य सांस्कृतिक भवन उभारणार असल्याचे प्रतिपादन पालकमंत्री गुलाबराव पाटील यांनी केले.
ते आदिवासी दिनाच्या व महसूल पंधरवड्यानिमिताने धरणगाव येथे आयोजित आदिवासी बांधवांच्या मेळाव्यात बोलत होते. अध्यक्षस्थानी प्रांताधिकारी मनोज कुमार गायकवाड होते. पालकमंत्री बोलताना पुढे म्हणाले की, आदिवासी लाभार्थ्यांना समाजाच्या मुख्य प्रवाहात आणण्यासाठी शासन योजनांची प्रभावीपणे अंमलबजावणी करत आहे. यावर्षी चांदसरसह जिल्ह्यात तब्बल सहा शाळा, एक वसतिगृह बांधकामासाठी कोट्यवधी निधी मंजूर आहे. तालुक्यात ख्वाजाजी नाईक स्मारकाचे काम सुरू आहे. आदिवासी बांधवांनी एकजुटीने उभे राहून लाडकी बहिण योजनेसाठी लवकरात लवकर नोंदणी करण्याचे आवाहन केले.
प्रास्ताविकात तहसीलदार सूर्यवंशी यांनी महसूल पंधरवड्यात राबविण्यात आलेल्या उपक्रमांविषयी व जागतिक आदिवासी दिनानिमित्त सविस्तर माहिती विशद केली. सूत्रसंचालन उपशिक्षक आर. डी. महाजन यांनी केले. आभार गटविकास अधिकारी सुशांत पाटीत यांनी मानले. यावेळी मागासवर्गीय सेनेचे जिल्हाप्रमुख तथा माजी सभापती मुकुंदराव नन्नवरे व राज्याचे टायगर प्रवक्ते पंढरीनाथ मोरे यांनी पालकमंत्र्यांनी आदिवासी समाजासाठी केलेल्या कामाविषयी आभार व्यक्त केले.
पालकमंत्री पाटील यांच्या हस्ते तालुक्यातील ३७४ जातीचे सर्टिफिकेट, ११२ रेशन कार्ड आणि ४५३ उत्पन्नाचे दाखले तसेच आदिवासी घटकांच्या लाभार्थ्यांना विविध शासकीय योजनांचे लाभ व दाखले वाटप करण्यात आले. व्यासपीठावर गटविकास अधिकारी सुशांत पाटील, शिवसेनेचे तालुकाप्रमुख डी. ओ. पाटील, माजी सभापती मुकुंदराव नन्नवरे, शहर प्रमुख विलास महाजन आदी मान्यवर व्यासपीठावर तर आदिवासी टायगर सेनेचे जिल्हास्तरीय पदाधिकारी संभाजी सोनवणे, विकास मालचे, सुनील सोनवणे, शरद पवार, विजय मालचे, रामचंद्र वाघ, गटनेते पप्पू भावे, रवींद्र कंखरे यांच्यासह तालुक्यातील सरपंच, पदाधिकारी व आदिवासी बांधव पारंपारिक वेशभूषेत मोठ्या संख्येने उपस्थित होते.
