जामनेर (प्रतिनिधी) : धरण परिसरातील शेतजमीन व जलस्रोत प्रदूषित करून मानवी आरोग्यास धोका निर्माण केल्याप्रकरणी एका व्यक्तीविरुद्ध पहूर पोलीस ठाण्यात गुन्हा दाखल करण्यात आला आहे. या घटनेमुळे परिसरात खळबळ उडाली असून पर्यावरण व सार्वजनिक आरोग्याचा गंभीर प्रश्न निर्माण झाला आहे.
पोलीस सूत्रांकडून मिळालेल्या माहितीनुसार, जामनेर तालुक्यातील तोंडापूर शिवारातील गट क्रमांक २५३/२ तसेच हालसिंगी शिवारातील गट क्रमांक ११८/२ मधील शेत परिसरात ही घटना उघडकीस आली. आरोपी शेख हसन शेख सांडू (रा. तोंडापूर, ता. जामनेर) याने काही विषारी रासायनिक पदार्थ ड्रम व प्लास्टिक बॅगमध्ये भरून परिसरात टाकल्याचा आरोप आहे.
याबाबत मंडळ अधिकारी प्रशांत साहेबराव साळुंखे (वय ४२) यांनी दिलेल्या फिर्यादीवरून गुन्हा दाखल करण्यात आला. फिर्यादीनुसार, आरोपीने संबंधित रासायनिक पदार्थ परिसरात टाकल्याने ते जमिनीत व जलस्रोतांमध्ये मिसळले. त्यामुळे परिसरात तीव्र दुर्गंधी पसरून मानवी आरोग्यास धोका निर्माण झाला असून पर्यावरणाचेही नुकसान झाले आहे.
या प्रकरणी पहूर पोलीस ठाण्यात भारतीय न्याय संहितेच्या कलम २७१, २७२, २७९, २८० व २८६ अन्वये गुन्हा दाखल करण्यात आला आहे.
घटनेचा पुढील तपास सहाय्यक पोलीस निरीक्षक प्रमोद कठोरे यांच्या मार्गदर्शनाखाली पोलीस उपनिरीक्षक गणेश सुस्ते करीत आहेत.
