जळगावात कोट्यवधींचा डल्ला
जळगाव ( प्रतिनिधी ) – शहरात एक खळबळजनक घटना उघडकीस आली असून, भास्कर मार्केटसमोरील ‘दक्षता पेट्रोल पंपा’वर तब्बल १ कोटी ३३ लाख ७५२ रुपयांचा मोठा आर्थिक अपहार झाला आहे. याप्रकरणी पंपाचे व्यवस्थापक वाल्मीक मधुकर वाघ यांच्यावर जळगाव शहर पोलीस ठाण्यात गुन्हा दाखल करण्यात आला आहे. दक्षता पेट्रोल पंपावर १ एप्रिल २०२५ ते ९ फेब्रुवारी २०२६ या कालावधीत पेट्रोल आणि डिझेलच्या विक्रीतून जमा झालेली १,३३,००,७५२ रुपयांची रक्कम बँकेत जमा करणे आवश्यक होते.
मात्र, संशयित आरोपी वाल्मीक वाघ (रा. जळगाव) याने ही रक्कम पंपाच्या अधिकृत बँक खात्यात भरली नाही. ही अवाढव्य रक्कम त्याने स्वतःच्या फायद्यासाठी वापरून पंपाची आणि मालकाची मोठी फसवणूक केल्याचे तपासात समोर आले आहे. या प्रकरणी संदीप उत्तमराव पाटील (वय ४६, उपअधीक्षक, आर्थिक गुन्हे शाखा, जळगाव) यांनी फिर्याद दिली आहे. त्यांच्या तक्रारीवरून फसवणूक आणि अपहाराचा गुन्हा नोंदवण्यात आला आहे.
गुन्ह्याचे गांभीर्य ओळखून वरिष्ठ पोलीस अधिकाऱ्यांनी तातडीने तपासाची चक्रे फिरवली आहेत. अप्पर पोलीस अधीक्षक अशोक नखाते यांनी सायंकाळी ७ ते रात्री ९:१५ दरम्यान घटनास्थळी भेट देऊन पाहणी केली. उपविभागीय पोलीस अधिकारी नितीन गणापुरे यांनीही प्रत्यक्ष भेट देऊन तपासाच्या सूचना दिल्या आहेत. सध्या या प्रकरणाचा तपास स्थानिक गुन्हे शाखेचे पोलीस निरीक्षक राहुल गायकवाड करत आहेत. जळगाव शहरात इतक्या मोठ्या रकमेचा अपहार झाल्याने व्यापारी वर्गात मोठी खळबळ उडाली आहे.
