जळगाव शहरात खोटे नगर परिसरातील घटना
जळगाव ( प्रतिनिधी ) : – खोटेनगरजवळ मंगळवारी रात्री ८ वाजेच्या सुमारास झालेल्या भीषण अपघातात भरधाव ट्रॅव्हल्सने दुचाकीला धडक दिल्याने दोन सख्खे भाऊ गंभीर जखमी झाले. जखमींपैकी एकाची प्रकृती चिंताजनक असल्याने त्याला अतिदक्षता विभागात दाखल करण्यात आले आहे.
निमखेडी येथील रहिवासी गणपत भिकन कुंभार (वय ३५) आणि त्यांचा लहान भाऊ अर्जुन कुंभार हे दोघे रात्रीच्या वेळी आपल्या दुचाकीने निमखेडीकडून खोटेनगरच्या दिशेने जात होते. याचवेळी, हॉटेल राधिकाजवळ पाळधीकडून जळगावकडे येणाऱ्या एका भरधाव ट्रॅव्हल्सने त्यांच्या दुचाकीला जोरदार धडक दिली.धडक इतकी भीषण होती की, दुचाकीचा पूर्णपणे चक्काचूर झाला. यात दोन्ही भावंड रस्त्यावर पडून गंभीर जखमी झाले.
अपघात होताच परिसरातील नागरिकांनी तातडीने धाव घेतली आणि दोन्ही जखमींना उपचारासाठी शासकीय वैद्यकीय महाविद्यालय व रुग्णालयात दाखल केले. या अपघातात गणपत कुंभार यांना गंभीर दुखापत झाली असून त्यांच्यावर रुग्णालयाच्या अतिदक्षता विभागात उपचार सुरू आहेत. तर, त्यांचा लहान भाऊ अर्जुन कुंभार यांच्यावर किरकोळ दुखापतींवर उपचार सुरू आहेत. जळगाव तालुका पोलीस स्टेशनला गुन्हा दाखल करण्याचे काम सुरू होते.
