पाचोरा;- शहरात सुरु असणाऱ्या एका चॉकलेट बनविणाऱ्या फॅक्टरीत अस्वच्छ वातावरणात चॉकलेटची निर्मिती आणि कच्च मालाचा साठा आढळून आल्याने अधिकाऱ्यांनी कंपनीच्या प्रशासनाविरुद्ध कारवाई केली आहे . यामुळे शहरात खळबळ उडाली आहे .
अन्न व औषध प्रशासन कार्यालयातील अन्न सुरक्षा अधिकारी विवेक पाटील यांना मिळालेल्या माहितीनुसार मे. जय गुरुदेव इंडस्ट्रीज अॅण्ड वेअर हाऊसिंग, ४७ / १-२, वरखेडी रोड, पाचोरा येथे २९ जानेवारी २०२० रोजी धाड टाकली असता सदर आस्थापना ही एक्सपोर्टसाठी शुगर बॉईल्ड कन्फेक्शनरी तयार करीत असतांना आढळले. तसेच काही डोमेस्टिक उद्देशासाठी शुगर बॉईल्ड कन्फेक्शनरी स्थानिक विक्री करीता उत्पादन करीत असल्याचे आढळले. या ठिकाणी तपासणी अंती आस्थापनेत केंद्रीय अन्न सुरक्षा मानके कायदा २००६ अंतर्गत परवाना आढळून आला. सदर आस्थापनेत शुगर बॉईल्ड कन्फेक्शनरीचे उत्पादन अत्यंत अस्वच्छ वातावरणात सुरु असल्याचे आढळले. अन्न सुरक्षा अधिकारी विवेक पाटील यांनी अ.सु.मा.का. अंतर्गत रितसर कच्चा मालातून ब्राऊन शुगर चा नमुना विश्लेषणाकरीता घेवून शिल्लक ३ लाख १० हजार रुपये किंमतीचे २०० कट्टे जप्त केले आहे. सदरचा नमुना विश्लेषणाकरीता अन्न विश्लेषकांकडे पाठविण्यात आला होता. प्राप्त अहवालानुसार पदनिर्देशित अधिकारी यांनी सदरचा अहवाल असुरक्षित घोषित केलेला आहे. सदर प्रकरणी अन्न सुरक्षा व मानके कायदयाच्या कलम, नियम व विनियमानुसार पुढील कार्यवाही प्रशासनामार्फत घेण्यात येणार आहे. सदर प्रकरणी अन्न सुरक्षा अधिकारी विवेक पाटील यांनी सहाय्यक आयुक्त (अन्न), अन्न व औषध प्रशासन, महाराष्ट्र राज्य, जळगाव यो. को. बेंडकुळे यांचे मार्गदर्शनाखाली कारवाई केली आहे.
