जळगावात एसीपींच्या घराजवळील घटना
जळगाव (प्रतिनिधी) : दारु पिण्यासाठी ५० रुपये न दिल्यामुळे रागाच्या भरात नरेश सौदमसिंग कदम (वय ४२, रा. समता नगर) यांना एका तरुणाने लाकडी दांडक्याने बेदम मारहाण केली. ही घटना दि. २० रोजी रात्री ९ वाजेच्या सुमारास एसीपी नखाते यांच्या घराजवळ हॉटेल रॉयल पॅलेस समोर घडली. याप्रकरणी रामानंदनगर पोलीस ठाण्यात गुन्हा दाखल करण्यात आला आहे.
शहरातील समता नगरात राहणारे नरेश सौदामसिंग कदम (वय ४२) हे सुरक्षा रक्षक म्हणून काम करतात. दि. २० रोजी रात्री ८.३० वाजेच्या सुमारास संशयित यश सूर्यकांत वानखेडे (वय १९, रा. पी.डब्लू.डी. कॉलनी) याने नरेश कदम यांना दारू पिण्यासाठी ५० रुपये मागितले. मात्र, नरेश कदम यांनी आपल्याकडे पैसे नसल्याचे सांगितल्याने आरोपीला याचा राग आला. रागाच्या भरात आरोपी यश वानखेडे याने नरेश कदम यांना शिवीगाळ केली आणि लाकडी दांडक्याने मारहाण करून जखमी केले. या भांडणाचा आवाज ऐकून नरेश कदम यांची पत्नी आणि त्यांचे मामा बाळू खैरनार हे भांडण सोडविण्यासाठी मध्ये पडले. त्यावेळी आरोपी यश वानखेडे याने ‘मी याला आज मारून टाकेन, तुम्ही फक्त पहा’ अशी धमकी देऊन त्यांना जीवे ठार मारण्याची धमकी दिली. याप्रकरणी रामानंद नगर पोलिसात गुन्हा दाखल करण्यात आला आहे.
