जळगाव शहरातील घटना, दोघांना अटक
जळगाव (प्रतिनिधी) :- एमआयडीसी परिसरातील दाल व्यापारी विनोदकुमार चंचलचंद जैन (वय ४१) यांची सुमारे ३६ लाख ३९ हजार ६५० रुपयांची फसवणूक झाल्याचा प्रकार उघडकीस आला आहे. या प्रकरणी जळगाव एमआयडीसी पोलीस ठाण्यात बालाजी ट्रेण्डिंगचे दलाल सूरजकांत ऊर्फ राज संजय व्यास, किशोर ट्रेडर्सचे प्रोप्रायटर किशोर मिठालाल पुरोहित, आयुष ट्रेडर्सचे प्रोप्रायटर दीपक राजेश व्यास आणि विष्णुकांत लक्ष्मी नारायण पुरोहित ट्रेडर्सचे प्रोप्रायटर श्रीकांत पुरोहित यांच्या विरोधात फसवणुकीचा गुन्हा दाखल करण्यात आला आहे.
विनोदकुमार जैन हे दाल व्यापारी असून, सूरजकांत व्यास हा त्यांच्या मार्फत दलालीचा व्यवसाय करत होता. सूरजकांत व्यासाने जैन यांचा विश्वास संपादन करून, मालाचे पैसे तात्काळ देण्याचे आश्वासन दिले.(केसीएन)त्यानंतर, जैन यांनी संशयित आरोपींना मुग डाळ (कच्चा माल) पुरवला. मात्र, चौघांनी परस्पर संगनमत करून, परस्पर मालाची विक्री केली आणि त्याचे पैसे जैन यांना परत दिले नाहीत. जेव्हा जैन यांनी आपल्या पैशांची मागणी केली, तेव्हा चौघांनी त्यांना उडवाउडवीची उत्तरे दिली.
तसेच, “आम्ही पैसे देणार नाही, तुझ्याकडून जे होईल ते करून घे, आम्ही कोणाला घाबरत नाही, पुन्हा आमच्याकडे पैसे मागीतले तर तुला सोडणार नाही” अशी धमकीही दिली. या प्रकारानंतर, जैन यांनी एमआयडीसी पोलीस ठाण्यात तक्रार दाखल केली. विनोदकुमार जैन यांच्या तक्रारीवरून, पोलिसांनी सूरजकांत ऊर्फ राज संजय व्यास, किशोर पुरोहित, दीपक व्यास आणि श्रीकांत पुरोहित यांच्या विरोधात फसवणुकीचा गुन्हा दाखल केला आहे. या प्रकरणाचा तपास पोलीस उपनिरीक्षक अशोक काळे करत आहेत. यातील दोघांना अटक करण्यात आली आहे.
