मालेगावहून परतताना छोटा हत्तीला पिकअपची जोरदार धडक; आई-वडील गंभीर जखमी
चाळीसगाव (प्रतिनिधी) : मालेगाव तालुक्यातील दहिवाळ फाट्याजवळ झालेल्या भीषण अपघातात एकाच कुटुंबातील दोन सख्या बहिणींचा दुर्दैवी मृत्यू झाल्याची हृदयद्रावक घटना घडली. या दुर्घटनेत त्यांच्या आई-वडिलांसह अन्य दोन जण गंभीर जखमी झाले असून परिसरात शोककळा पसरली आहे.
मिळालेल्या माहितीनुसार, हिरापूर येथील रहिवासी राकेश शिंदे हे आपल्या कुटुंबीयांसह मालेगाव येथे नातेवाईकांच्या कार्यक्रमासाठी गेले होते. कार्यक्रम आटोपल्यानंतर ते छोटा हत्ती वाहनाने गावाकडे परतत असताना दहिवाळ फाट्याजवळ समोरून येणाऱ्या भरधाव पिकअप वाहनाने त्यांच्या वाहनाला जोरदार धडक दिली.
या भीषण अपघातात जयश्री राकेश शिंदे (वय १९) हिचा घटनास्थळीच मृत्यू झाला. तर राकेश शिंदे, त्यांची पत्नी, दुसरी मुलगी नंदिनी शिंदे (वय १६) आणि अन्य दोन जण गंभीर जखमी झाले. अपघातानंतर स्थानिक नागरिकांनी तातडीने मदतकार्य करत जखमींना उपचारासाठी खासगी रुग्णालयात दाखल केले.
रुग्णालयात उपचार सुरू असताना नंदिनी शिंदे हिची प्रकृती अधिक खालावली. डॉक्टरांच्या प्रयत्नांनंतरही तिचा जीव वाचू शकला नाही. त्यामुळे एकाच कुटुंबातील दोन सख्या बहिणींचा अल्पावधीत मृत्यू झाल्याने शिंदे कुटुंबावर दुःखाचा डोंगर कोसळला आहे.
या दुर्दैवी घटनेनंतर हिरापूर गावात शोकमय वातावरण निर्माण झाले आहे. नातेवाईक, मित्रपरिवार आणि ग्रामस्थांकडून हळहळ व्यक्त केली जात असून संपूर्ण परिसर हादरला आहे.अपघाताची माहिती मिळताच पोलिसांनी घटनास्थळी धाव घेत पंचनामा केला. या प्रकरणी पुढील तपास सुरू असून अपघाताचे नेमके कारण शोधण्याचे काम सुरू असल्याची माहिती पोलिसांनी दिली.
