जळगावात डॉक्टरसह लॅबवर गुन्हा दाखल
जळगाव (प्रतिनिधी) : विमा धारकाच्या संमतीशिवाय त्याला रुग्णालयात ॲडमिट दाखवून आणि बनावट वैद्यकीय अहवाल तयार करून इन्शुरन्स कंपनीकडून पैशांचा क्लेम लाटल्याचा धक्कादायक प्रकार समोर आला आहे. याप्रकरणी जळगाव येथील टायटन मल्टीस्पेशालिटी हॉस्पिटलचे डॉक्टर आणि जोगेश्वरी पॅथॉलॉजी लॅबच्या व्यवस्थापकाविरुद्ध एम.आय.डी.सी. पोलीस ठाण्यात फसवणुकीचा गुन्हा दाखल करण्यात आला आहे.
फिर्यादी विजय संतराम गुप्ता (वय २५, रा. तुघलकाबाद, नवी दिल्ली) यांच्याकडे ‘न्यू इंडिया पॉलिसी को. लि.’ची मेडिकल इन्शुरन्स पॉलिसी आहे. २१ सप्टेंबर २०२४ रोजी फिर्यादी प्रत्यक्षात हजर नसताना, त्यांच्या संमतीशिवाय टायटन मल्टीस्पेशालिटी हॉस्पिटल येथे त्यांना उपचारासाठी दाखल दाखवण्यात आले. या काळात जोगेश्वरी पॅथॉलॉजी लॅब येथे विजय गुप्ता यांच्या नावाने बनावट मेडिकल टेस्ट रिपोर्ट तयार करण्यात आले. या खोट्या कागदपत्रांच्या आधारे विमा कंपनीकडे क्लेम करून रक्कम मंजूर करून घेण्यात आली. अशा प्रकारे फिर्यादीच्या नावाचा गैरवापर करून त्यांची आर्थिक फसवणूक करण्यात आली आहे.
या प्रकरणाचा उलगडा झाल्यानंतर विजय गुप्ता यांनी पोलीस ठाण्यात धाव घेतली. त्यांच्या तक्रारीवरून १३ फेब्रुवारी २०२६ रोजी रात्री उशिरा गुन्हा दाखल करण्यात आला. संशयित आरोपी डॉ. इम्रान बी. नाईकवाडी (टायटन हॉस्पिटल), आणि व्यवस्थापक, जोगेश्वरी पॅथॉलॉजी लॅब यांच्यावर गुन्हे दाखल करण्यात आले आहेत. सदर कारवाई पोलीस निरीक्षक बबन आव्हाड आणि सपोनि गणेश वाघ यांच्या मार्गदर्शनाखाली करण्यात आली असून, पुढील तपास फौजदार चंद्रकांत धनके करत आहेत. सध्या या प्रकरणात कोणालाही अटक करण्यात आलेली नाही.
