जळगाव शहरातील रामेश्वर कॉलनी परिसरात घटना
जळगाव (प्रतिनिधी) येथील मेहरूण परिसरातील रामेश्वर कॉलनी येथे साई गजानन रेसिडेन्सी येथील अपार्टमेंट मध्ये लावलेली १८ दुचाकी वाहने पहाटे २ वाजेच्या सुमारास जळून खाक झाल्याची घटना शनिवारी दि. १४ फेब्रुवारी रोजी उघडकीस आली आहे. याप्रकरणी एमआयडीसी पोलीस स्टेशनला घटनेची नोंद घेण्याचे काम सुरू होते.
मेहरूण परिसरामध्ये रामेश्वर कॉलनी येथे साई गजानन रेसिडेन्सी ही मोठी सदनिका आहे. या अपार्टमेंटमध्ये अनेक रहिवासी आहेत. त्यांनी त्यांच्या दुचाकी अपार्टमेंटच्या खाली नेहमीप्रमाणे उभ्या केलेल्या होत्या. दरम्यान शनिवारी मध्यरात्री २ वाजेच्या सुमारास अचानक दुचाकींना आग लागली. प्रथम मजल्यावर राहणाऱ्या एका व्यक्तीला लघुशंका लागल्यानंतर तो जेव्हा बाहेर गॅलरीत आला तेव्हा त्याला आग दिसली. त्याने आरडाओरडा करून अपार्टमेंटमधील इतर रहिवाशांना बोलावले.
तसेच पाण्याची मोटार लावून पाणी टाकण्याचा प्रयत्न केला. मात्र काही दुचाकींच्या पेट्रोलच्या टाक्यांचा स्फोट झाल्याचे त्यांनी सांगितले. त्यामुळे पाणी मारण्यास अडचणी आल्या.(केसीएन)या वेळेला जळगाव शहर महानगरपालिकेच्या अग्निशमन दलाच्या बंबांनी येऊन आग आटोक्यात आणली. सदरची घटना एखाद्या माथेफिरूने केली असल्याचा नागरिकांना संशय आहे. याबाबतचे सीसीटीव्ही फुटेज तपासणी करण्याचे काम पोलीस व नागरिकांकडून सुरू आहे. घटनेची माहिती मिळताच एमआयडीसी पोलीस स्टेशनचे कर्मचारी घटनास्थळी दाखल झाले होते.
तर आग विझवण्याकामी अग्निशमन दलाचे वाहनचालक देविदास सुरवाडे, फायरमन रोहिदास चौधरी, यश मनोरे, चेतन सपकाळे, योगेश पाटील, ऋषभ सुरवाडे, भावेश मराठे आदींनी परिश्रम घेतले.(केसीएन)या घटनेमध्ये आत्माराम जाधव, शिरीष सोनवणे, अजय कापुरे, सुरेश सोनवणे, शरद बोरसे, ललित वेडीस, ज्योती पवार, राजेश खिडके, भारत तामनेरकर, किरण पाटील, सुधीर पाटील, मनोज मोरे, धोंडू बडगुजर यांच्या दुचाकींसह सागर पाटील व संग्राम विसपुते यांच्या प्रत्येकी २ दुचाकी जळून खाक झाले आहेत. रात्री घटनास्थळी परिसरातील नागरिकांनी मोठी गर्दी केली होती.
