जळगावातील घटना, पोलीस स्टेशनला नोंद नाही
जळगाव (प्रतिनिधी) : अंधाराचा फायदा घेत दबा धरुन बसलेल्या दोन जणांनी दुचाकीवरुन जात असलेल्या एका व्यक्तीच्या डोळ्यात मिरची पुड टाकून लुटण्याचा प्रयत्न केला. ही धक्कादायक घटना सोमवारी रात्री साडेआठ वाजेच्या सुमारास शहरातील गणेश कॉलनीतील कन्याशाळेजवळ घडली.
शहरातील गणेश कॉलनीत वास्तव्यास असलेली एक व्यक्ती व्यापारी आहे. दुकान बंद करुन ते घरी येत होते. यावेळी त्यांना एक ओळखीची व्यक्ती भेटल्याने ते वेगवेगळ्या दुचाकीवरुन गप्पा मारत घराकडे जात होते. गणेश कॉलनीतील कन्या शाळेजवळ अंधाराचा फायदा घेत दोन इसम दबा धरुन बसलेले होते. व्यापारी हे दुचाकीने पुढे जात असतांना त्यांचा मित्र त्यांच्या मागून येत होता. त्यांच्याकडे बॅग असल्याने चोरट्यांना त्यामध्ये ऐवज असल्याचा संशय आला.
त्यांनी पुढे चालणाऱ्या व्यापाऱ्याच्या डोळ्यात मिरचीपुड फेकली. परंतु त्या व्यापाऱ्याने चष्मा लावलेला असल्याने काही प्रमाणात मिरची त्यांच्या डोळ्यात उडाली आणि त्यांनी लागलीच त्यांची दुचाकी थांबवली.
घटनेची माहिती कुटुंबियांना दिल्यानंतर त्यांच्यासह परिसरातील नागरिकांनी त्याठिकाणी धाव घेतली. त्यांनी घटनेची माहिती जिल्हापेठ पोलिसांना दिली. पोलिसांनी घटनास्थळी धाव घेत संबंधितांना तक्रार देण्याविषयी सांगितले. परंतु आपल्याकडील कुठलाही ऐवज गेला नसल्याचे कारण देत त्यांनी तक्रार देण्यास नकार दिला. त्यामुळे रात्री उशिरापर्यंत पोलिसात कुठलाही गुन्हा दाखल करण्यात आला नव्हता.
