भुसावळ बाजारपेठ पोलीस स्टेशनची ३ दिवसात कारवाई
भुसावळ (प्रतिनिधी) : शहरातील गुंजाळ कॉलनी येथील वृद्धाचे घरी अज्ञात चोरटयांनी घरफोडी करून सोन्या-चांदीचे दागिने आणि रोख रक्कम असा एकुण २ लाख ६९ हजार रुपये किंमतीचा ऐवज चोरून नेल्याची घटना रविवारी दि. २८ जुलै रोजी सकाळी ९.३० वाजता समोर आली आहे. याप्रकरणी सोमवारी २९ जुलै रोजी भुसावळ बाजारपेठ पोलीस ठाण्यात गुन्हा दाखल करण्यात आला होता. याप्रकरणी भुसावळ बाजारपेठ पोलीस स्टेशनने तीन दिवसात संशयित आरोपी निष्पन्न करून त्याच्याकडून पूर्ण मुद्देमाल ताब्यात घेण्यात यश मिळवले आहे.
रामप्रसाद गोपाल चंदन (वय-६६, रा. गुंजाळ कॉलनी, भुसावळ) हे परिवारासह राहतात. दि. २७ जुलै रोजी रात्री १० वाजेपासून ते दि. २८ जुलै रोजी सकाळी ९.३० वाजेच्या दरम्यान त्यांचे घर बंद होते. याचा फायदा घेत अज्ञात चोरट्यांनी घराच्या कंपाउंड गेटचे आणि मुख्य दरवाजाचे कुलूप तोडून आत प्रवेश करत कपाटातून सोन्याचे व चांदीचे दागिने आणि रोकड असा एकूण २ लाख ६९ हजार रुपये किंमतीचा ऐवज चोरून नेला.
ही घटना रविवारी २८ जुलै रोजी सकाळी ९.३० वाजता समोर आली. या घटनेबाबत रामप्रसाद चंदन यांनी भुसावळ बाजारपेठ पोलीस ठाण्यात धाव घेऊन तक्रार दिली. त्यानुसार अज्ञात चोरट्यांवर गुन्हा दाखल करण्यात आला. दरम्यान पोलीस पथकाला ही चोरी जावेद शेख शकील (वय २५, रा. रामदास वाडी, भुसावळ) यानी केल्याचे निष्पन्न झाले. त्याला पोलीस उपनिरीक्षक मंगेश जाधव, विजय नेरकर, निलेश चौधरी, जावेद शहा, योगेश महाजन, राहुल वानखेडे, सचिन चौधरी यांनी ताब्यात घेतले.
त्याची कसून चौकशी केली असता त्याने गुन्ह्यात चोरलेला सर्व मुद्देमाल काढून दिला आहे. ही कारवाई पोलीस निरीक्षक गजानन पडघन यांच्या मार्गदर्शनाखाली करण्यात आली आहे.
