पाच अज्ञात व्यक्तींविरुद्ध जिल्हापेठ पोलीस ठाण्यात गुन्हा ; जळगावातील घटना
जळगाव (प्रतिनिधी ) ;- दुचाकीचा कट लागल्याच्या कारणावरून अनोळखी चार-पाच जणांनी तरूणाला शिवीगाळ करत दगड व फरशीचे तुकडे डोक्यात टाकून जखमी केल्याची घटना शहरातील भजे गल्लीतील सुयोग हॉटेलसमोर रविवारी ७ जुलै रोजी सायंकाळी ५ वाजेच्या सुमारास घडली. याप्रकरणी सोमवारी रात्री जिल्हापेठ पोलीस ठाण्यात गुन्हा दाखल करण्यात आला.
विक्की सुनिल सोनवणे वय २४ रा. सुरेशदादा जैन नगर, गेंदालाल मिल, जळगाव हा तरूण रविवारी ७ जुलै रोजी सायंकाळी ५ वाजता तो नवीन बसस्थानकाजवळील भजे गल्लीतून दुचाकीने जात असतांना त्यांच्या दुचाकीचा एका दुसऱ्या दुचाकीला कट लागला. या कारणावरून विक्की सोनवणे याला अनोळखी ५ जणांनी शिवीगाळ करत वाद घालून दगड व फरशीचे तुकडे डोक्यात टाकून गंभीर जखमी केल्याची घटना घडली. जखमी झालेल्या तरूणाला तातडीने जिल्हा शासकीय वैद्यकीय महाविद्यालयात उपचारार्थ दाखल करण्यात आले. याप्रकरणी विक्की सोनवणे याने दिलेल्या फिर्यादीवरून मारहाण करणारे अज्ञात ५ जणांविरोधात जिल्हापेठ पोलीस ठाण्यात गुन्हा दाखल करण्यात आला आहे. तपास महिला पोलीस हेड कॉन्स्टेबल पल्लवी मोरे हे करीत आहे.
