पाचोरा (प्रतिनिधी ) – जळगावातील खंडेराव नगर येथील सासर असलेल्या विवाहितेने माहेरी शेवाळे येथे पतीसह सासरच्या व्यक्तींकडून सातत्याने गाडी घेण्यासाठी पैशांची मागणी होत असल्याने कंटाळून आत्महत्या केल्याचे समोर आले असून याप्रकरणी आता पतीसह सासरच्या लोकांविरुद्ध गुन्हा दाखल करण्यात आला आहे.
शेवाळे येथील माहेर असलेल्या विवाहिता उमा सनी उमप यांचा विवाह जळगाव शहरातील खंडेराव नगरातील सनी उर्फ खेडू प्रेमनाथ उमप याच्याशी झाला होता. पती सनी याने गाडी घेण्यासाठी माहेरहून विवाहितेला ५० हजार रूपये आणण्याची मागणी केली. दरम्यान, विवाहितेने पैसे आणले नाही म्हणून पती सनी उमप याने पत्नी उमा हिला शिवीगाळ करून तू जर पैसे आणले नाही तर तु फाशी घेवून मरून जा किंवा विषारी औषध घेवून मरून जा परत मला तुझे तोंड दाखवू नको असे बोलून मारहाण केली. तसेच विवाहितेच्या सासरच्या मंडळींनी देखील शिवीगाळ करून मारहाण केली. या छळाला कंटाळून विवाहिता माहेरी असतांना १२ जून रोजी दुपारी दीड वाजेच्या सुमारास महेरी गळफास घेवून आत्महत्या केली. याबाबत १५ ऑगस्ट रोजी विवाहितेच्या आई रत्नाबाई नानू फाजगे रा. शेवाळे ता. पाचोरा यांनी पिंपळगाव हरेश्वर पोलीस ठाण्यात धाव घेवून तक्रार दिली. त्यांच्या तक्रारीवरून पती सनी उर्फ खेडू प्रेमराज उमप, गिताबाई प्रेमनाथ उमप, सासरे प्रेमराज उमप आणि गुड्डी उमप सर्व रा. रेल्वे पुलाच्या बाजूला खंडेराव नगर, जळगाव यांच्या विरोधात पिंपळगाव हरेश्वर पोलीस ठाण्यात गुन्हा दाखल करण्यात आला आहे. तपास पोलीस उपनिरीक्षक अमोल पवार करीत आहे.
