जळगाव शहरातील एमआयडीसी परिसरातील घटना
जळगाव (प्रतिनिधी) : खोटे नाव सांगून अल्पवयीन मुलीशी मैत्री करीत तिच्यासोबत आक्षेपार्ह फोटो काढून धमकी देऊन तिचा विनयभंग करण्यात आला. तसेच धमकी देणे सुरूच ठेवत शरीर सुखाचीही मागणी केली. या प्रकरणी आयान शेख नूर मोहम्मद (१९, रा. गेंदालाल मिल परिसर) याला एमआयडीसी पोलीस स्टेशनच्या कर्मचाऱ्यांकडून अटक करण्यात आली असून त्याला दोन दिवसांची पोलिस कोठडी सुनावली आहे.
एमआयडीसी पोलिस ठाण्याच्या हद्दीतील एका अल्पवयीन मुलीला आयान शेख याने विशाल शर्मा असे खोटे नाव सांगून तिच्याशी मैत्री केली. त्यानंतर तिच्यासोबत दि. २२ डिसेंबर २०२४ रोजी आक्षेपार्ह फोटो काढले. ते फोटो व्हायरलची धमकी देत २६ मार्च रोजी पुन्हा अश्लील वर्तन करीत तिचा विनयभंग केला. त्यानंतर धमकी देत शरीर सुखाची मागणी केली.
अखेर या प्रकाराला कंटाळून मुलीने एमआयडीसी पोलिस ठाण्यात फिर्याद दिली. त्यावरून अयान शेख याच्याविरुद्ध गुन्हा दाखल होऊन त्याला अटक करण्यात आली आहे. त्याला न्यायालयात हजर केले असता दोन दिवसांची पोलिस कोठडी सुनावण्यात आली. सरकार पक्षातर्फे जिल्हा सरकारी वकील ॲड. सुरेंद्र काबरा यांनी काम पाहिले.
