भडगाव ( प्रतिनिधी ) – तालुक्यातील आमडदे येथील महाराष्ट्र ग्रामीण बँकेत खातेदारांनी तारण ठेवलेल्या दागिन्यांची चोरी झाली असून या कारस्थानात बँकेच्या कर्मचार्‍यांचा समावेश असल्याचे निष्पन्न झाले आहे. दोन कोटींपेक्षा जास्त मूल्याचे दागिने लंपास करण्याचा डाव पोलिसांनी अवघ्या काही तासांमध्ये उघडकीस आणला आहे.
आमडदे येथिल महाराष्ट्र ग्रामीण बँकेत तारण दागिन्यांची चोरी उघडकीस आल्याने खळबळ उडाली आहे. या जबरी चोरीचा उलगडा होऊन पो नि अशोक उत्तेकर व त्यांच्या सहकाऱ्यांनी अवघ्या तीन तासात संशयित आरोपी बँक कर्मचारी व त्याच्या दोन साथीदारांना ताब्यात घेत पर्दाफाश केला
आमडदे येथे महाराष्ट्र ग्रामीण बँकेची शाखा असुन येथे मॅनेजरसह तीन कर्मचारी कार्यरत आहे. २२ नोव्हेंबर रोजी रात्री २:३० वाजेच्या दरम्यान महाराष्ट्र ग्रामीण बकेत चोरी झाल्याची माहिती गावात पसरली. चोरी झाल्याची माहिती एका कर्मचाऱ्यानेच गावातील नागरीकांना दिली. माहिती भडगाव पोलीसाना देण्यात आली. घटनास्थळी चोरी करताना चोरांकडुन बँकेचे कुलुप तोडणे, तिजोरी फोडणे, लॉकर तोडणे असा प्रकार दिसुन येत नव्हता. बँकेत असलेल्या रोकड रक्कमेला हात लावलेला नव्हता. यामुळे यात बँकेतीलच कर्मचार्‍यांचा सहभाग असावा असा संशय प्रथमदर्शनी येत होता.
बँकेच्या मागे रहाणारा शिपाई राहुल पाटील यास विचारपुस करत माहिती घेतली व पोलीसी खाक्या पोलीसानी दाखविला तो पोपटासारखा बोलु लागला. शिपाई राहुल पाटील व त्याच्या अन्य दोन साथीदार यांना ताब्यात घेण्यात आले आहे. आरोपींच्या संख्येत वाढ होण्याची शक्यता पोलीसाकडुन वर्तविली जात आहे. जळगाव येथिल श्वान पथक पाचारण करण्यात आले होते. ३ आरोपीपैकी एका आरोपीच्या आमडदे शिवारातील शेतात व आंचळगाव रस्त्याकडील शेतात खड्डा करुन लपविलेले दागिने आरोपीनी काढुन दिले.
घटनास्थळी पोलीस अधिक्षक डा. प्रविण मुंडे, डीवायएसपी सचिन गोरे, उपविभागिय पोलीस अधिकारी कैलास गावडे यांनी भेट देऊन मार्गदर्शन केले. पुढील तपास पो नि अशोक उत्तेकर, एलसीबीचे पोलीस उपनिरीक्षक, त्याचे पथक , लक्ष्मण पाटील, भडगावचे सहाय्यक फौजदार कैलास गिते, विलास पाटील, स्वप्निल चव्हाण, किरण पाटील, ज्ञानेश्वर महाजन, चालक राजु पाटील हे पुढील तपास करीत आहेत.
नेमके किती रूपयांचे दागिने चोरण्यात आले होते याची माहिती मिळाली नाही. या तिन्ही संशयितांनी पोलिसांना पाच किलो सोन्याचे दागिने काढून दिले असून पंचनामा करण्यात आला आहे.
