जळगाव (प्रतिनिधी) : जळगाव तालुक्यातील शिरसोली येथील नेव्हरे शिवार परिसरातून अज्ञात चोरट्याने शेतकऱ्याचा १ लाख रुपये किमतीचा ट्रॅक्टर चोरून नेल्याची घटना उघडकीस आली आहे. याप्रकरणी एमआयडीसी पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
शिरसोली प्र. न. येथील रहिवासी शेतकरी पूनमचंद हरी चव्हाण (वय ४५) यांचा नेव्हरे शिवारात गट क्रमांक ५३० मध्ये शेत आहे. ५ फेब्रुवारी रोजी रात्री ८:०० ते ९:३० वाजेच्या सुमारास त्यांनी आपला स्वराज ७४४ कंपनीचा निळ्या रंगाचा ट्रॅक्टर (क्रमांक एमएच १९ बीजी ९५०६) शेतात उभा केला होता. या दरम्यान, कोणत्यातरी अज्ञात चोरट्याने फिर्यादीच्या संमतीशिवाय शेतातून हा ट्रॅक्टर चोरून नेला. ६ फेब्रुवारी रोजी रात्री उशिरा ही बाब लक्षात आल्यानंतर चव्हाण यांनी पोलिसांत धाव घेतली.
या चोरीप्रकरणी ६ फेब्रुवारी २०२६ रोजी रात्री १०:३५ वाजता एमआयडीसी पोलीस ठाण्यात गुन्हा नोंदवण्यात आला आहे. या घटनेची माहिती मिळताच एमआयडीसी पोलीस स्टेशनचे पोलीस निरीक्षक बबन मारुती आव्हाड यांच्या मार्गदर्शनाखाली पुढील तपासाला सुरुवात झाली आहे. सदर गुन्ह्याचा तपास सहा. फौजदार विजयसिंग पाटील हे करत आहेत. जळगाव परिसरात शेती अवजारे आणि वाहने चोरीच्या घटना वाढत असल्याने शेतकऱ्यांमध्ये चिंतेचे वातावरण निर्माण झाले आहे. पोलीस सध्या परिसरातील सीसीटीव्ही आणि इतर मार्गांनी चोरट्याचा माग काढत आहेत.
