चाळीसगाव (प्रतिनिधी ) – न्हावे येथील शेतकरी आबा शिवाजी चव्हाण हे आपल्या कुटुंबासह शेतात काम करत असताना त्यांच्या अंगावर वीज कोसळली. यात आबा चव्हाण यांच्यासह त्यांचा अल्पवयीन मुलगा विकी आबा चव्हाण याचा जागीच मृत्यू झाल्याची अतिशय दुर्दैवी घटना घडली. घटनेची माहिती प्राप्त होताच तात्काळ घटनास्थळी जाऊन पाहणी केली व दुःखाचा डोंगर कोसळलेल्या चव्हाण परिवाराचे, न्हावे ग्रामस्थांचे सांत्वन केले. सदर परिवारावर आलेले संकट हे कुठल्याही आर्थिक मदतीने किंवा सांत्वनाने भरून निघणार नाही इतके मोठे आहे मात्र अश्या काळात आपण सर्वांनी या कुटुंबाच्या पाठीशी राहून त्यांना आधार देणे गरजेचे आहे.
सदर परिवाराला तात्काळ शासकीय मदत मिळवून देण्याच्या सूचना तहसीलदार यांना केल्या असून माझी यानिमित्ताने सर्व चाळीसगाव वासीयांना विनंती आहे की निसर्गचक्र खूप बदलत असून कधी आणि किती मोठा पाऊस पडेल, वादळ येईल याची अनिश्चितता झाली आहे. पुढील ४ दिवस उत्तर महाराष्ट्रात मुसळदार पावसाचा अंदाज असल्याने आपण सर्वानी योग्य ती खबरदारी घ्यावी.
– आमदार मंगेश रमेश चव्हाण
