ग्रामीण पोलिसांची कारवाई
चोपडा (प्रतिनिधी) : तालुक्यातील मोरचिडा गावचे हद्दीत उमर्टी, अंमलवाडी ते मोरचिडा रस्त्यावर एक तरुण गावठी कट्टा घेऊन उभा असल्याची माहिती पोलिसांना मिळाली होती. चोपडा ग्रामीण पोलिसांनी सापळा रचून त्याला अटक केली आहे. त्याचकडे एक गावठी कट्टा आणि २ काडतुस मिळून आले आहे.
महेश बाळकृष्ण चव्हाण (वय ३१) असे अटकेतील तरुणाचे नाव आहे. चोपडा ग्रामीण पोलीस ठाण्याच्या पोलीस निरीक्षक कावेरी कमलाकर यांना माहिती मिळाली होती. दि.१ जून रोजी रात्री ८.४५ वाजेच्या सुमारास मोरचिडा गावचे हद्दीत उमर्टी, अंमलवाडी ते मोरचिडा रोडवर इसम महेश बाळकृष्ण चव्हाण (वय ३१, मुळ रा.नगर मनमाड रोड, दत्तनगर मु.पो शिडी ता. राहता जि. अहमदनगर हल्ली रा. जनार्दन नगर, जेलरोड, नाशिक) हा त्याचे ताब्यात १ गावठी पिस्टल आणि २ जिवंत काडतुस हे घेवुन जात आहे असे समजले होते.
पोलीस निरीक्षक कावेरी कमलाकर व सोबत पोलीस शिपाई दिपक शिंदे, रावसाहेब पाटील असे खाजगी वाहनाने रवाना होवुन त्यास सापळा रचून मोरचिडा गावी ताब्यात घेतले. त्याच्याकडे गावठी बनावटीचा कटटा (पिस्टल), पिवळया धातुचे २ काडतुस (राउंड) मिळून आले. तसेच त्याचकडून दुचाकी क्रमांक एमएच.१५.जेएन.४०३५ हस्तगत करण्यात आली आहे. याप्रकरणी गुन्हा दाखल करण्यात आला असून पुढील तपास पोलीस नाईक शशिकांत पारधी हे करीत आहेत.
