जळगाव ( प्रतिनिधी ) – चोपडा तालुक्यातील चहार्डी येथे चक्क एकाच रात्रीत चोरट्यांनी नऊ घरे फोडली. रोकड आणि दागिने लंपास केल्याचे उघडकीस आले घटनेची माहिती पोलीस पाटील रोहित रायसिंग यांनी चोपडा शहर पोलीसात दिली. नऊ घरातील चोऱ्यांमध्ये पाच लाख रुपयांचा ऐवज लंपास झाल्याची शक्यता आहे.
चहार्डी गावातील लग्न व इतर कार्यक्रमांनिमित्त घरे बंद असल्याचे पाहून चोरट्यांनी ही संधी साधली असा अंदाज आहे. ग्रापं सदस्य दिनकर सोनवणे यांच्या बंद घराचे कुलूप तोडून ७० हजार रुपये रोख , भोईवाड्यातील राहुल सोनवणे यांच्या घरातील ऐवज लंपास केला . अशोक पाटील, परेश पाटील, नीरज पाटील, चंदन प्रोव्हिजन, गणेश भोई, कोळीवाड्यातील संदीप शिरसाट, गुजरपुरा भागातील राजेंद्र महाजन यांच्या घरातून चोरट्यांनी रोख रक्कम व दागिने लांबविले आहेत. रोख रक्कम व दागिने किती गेले आहेत हे घरमालक घरी नसल्याने लगेच समजू शकले नाही. .
सहा महिन्यांपूर्वी चोरट्यांनी येथील शामराव पाटील माध्यमिक विद्यालयातील जनरल रजिस्टर दालनातच जाळून टाकल्याची घटना घडली होती. ते चोर अजूनही पोलिसांना हाती लागत नाहीत आता चोरट्यांनी पोलिसांना आव्हानच दिले आहे गावात ठिकठिकाणी सीसीटीव्ही कॅमेरे आहेत. झाडवन चौकातील सोन्या-चांदीच्या दुकानात व गुजरपुरा येथील किराणा दुकानासमोरील सीसीटीव्हीत चोरटे कैद झाले आहेत.या चोरट्यांच्या हातात गावठी कट्टा दिसत असल्याची चर्चा आहे.
