डोक्यावर, कपाळावर, उजव्या बाजूला, पाठीवर व पोटावर सपासप प्रहार; गंभीर दुखापत
चाळीसगाव शहर पोलिस ठाण्यात गुन्हा दाखल; आरोपीचा शोध सुरू
पोलिसांनी दिलेल्या माहितीनुसार, फिर्यादी धनंजय परशुराम चौधरी (वय ४४, व्यवसाय शेती, रा. शेवटकर नगर, शिवनेरी टॉवर, भडगाव रोड, चाळीसगाव) यांनी आरोपीला उसनेवार पैसे दिले होते. हे पैसे परत मागितल्याच्या कारणावरून आरोपी समाधान छोटू शिंपी (रा. शाहूनगर, भडगाव रोड, चाळीसगाव) याला राग आला.
या रागातून आरोपीने फिर्यादीच्या हातातील लाकडी दांड्याने त्याच्या डोक्यावर, कपाळावर, उजव्या बाजूला, पाठीवर आणि पोटावर सपासप मारहाण केली. या मारहाणीत फिर्यादी गंभीर जखमी झाले. त्यानंतर आरोपीने शिवीगाळ करून “तुला आता उडवून टाकतो, तुला जिवंत ठेवत नाही,” अशा शब्दांत जीवे मारण्याची धमकी दिल्याचे फिर्यादीने तक्रारीत नमूद केले आहे.
ही घटना २ सप्टेंबर २०२६ रोजी दुपारी सुमारे १२.३० वाजता घडली. घटनेनंतर ४ सप्टेंबर २०२६ रोजी रात्री ७.५३ वाजता चाळीसगाव शहर पोलिस ठाण्यात गुन्हा दाखल करण्यात आला.
याप्रकरणी भारतीय न्याय संहितेतील कलम ११८(१), ११५(२), ३५१(३) व ३५२ अन्वये गुन्हा दाखल करण्यात आला आहे. गुन्ह्याचा तपास पोहेकॉ ३०६ प्रशांत पाटील करीत आहेत. आरोपी अद्याप अटक झालेला नसून, त्याचा शोध घेण्यात येत आहे.
