एका संशयित तरुणाला अटक
जळगाव (प्रतिनिधी) :- चाळीसगाव शहरात एका इसमाला १८ गोण्यामधून गुटखा वाहून नेताना पोलिसांनी अटक केली आहे. त्याच्यावर चाळीसगाव शहर पोलीस स्टेशनला गुन्हा दाखल करण्यात आला आहे.
पोलीस निरीक्षक संदीप पाटील यांनी गोपनीय माहितीवरून पोलीस उप निरीक्षक, योगेश माळी, पोहेकों/पंढरी पवार, भुषण पाटील, गटु पाटील, मनोज चव्हाण अशांना कायदेशीर कारवाईसाठी रवाना केले होते. पोलीसांनी तिरंगा पुलावरुन येणाऱ्या जाणाऱ्या वाहनांची तपासणी सुरु केली. दि. १३ रोजी रात्री सव्वादहा वाजता एक इको वाहन क्रमांक (एमएच १९ इए ३९४८) हिची तपासणी केली. सदर वाहनात एकूण लहान मोठ्या अशा १८ गोण्या दिसून आल्या. पोलीसांनी गोण्यांची पाहणी केली असता त्यात प्रतिबंधित (गुटखा) पान मसाला व सुगंधीत तंबाखू असल्याचे आढळून आले.
पोलिसांनी अक्षय गुलाब कोतकर (वय २४ वर्षे, रा. गुरुवर्य नगर, तिरंगा पूलजवळ, चाळीसगांव) याला मुद्देमालासह ताब्यात घेऊन अटक करण्यात आली आहे. त्याच्याकडून ९ लाख २४ हजार रुपयांचा गुटखा, कार असा मुद्देमाल जप्त झाला आहे.
