चाळीसगाव तालुक्यातील दसेगाव फाट्यावरील घटना
जळगाव (प्रतिनिधी) : मुलाला शाळेत जाण्यासाठी त्याला शाळेच्या व्हॅनजवळ पित्याने सोडले. त्यानंतर मुलाला सोडून वडील दुचाकीने घरी जात असताना मागुन भरधाव वेगाने येणाऱ्या दुसऱ्या दुचाकीने त्यांच्या दुचाकीला जोरदार धडक दिली. यात रस्त्यावर फेकले जाऊन गंभीर जखमी झाले होते. मात्र उपचारादरम्यान वडिलांचा मृत्यू झाला आहे. याप्रकरणी मेहुणबारे पोलीस स्टेशनला नोंद करण्यात आली आहे.
सुवर्णसिंग घोरपडे (वय ३५, नवे दसेगाव ता. चाळीसगाव) असे अपघातात मृत झालेल्या तरुणाचे नाव आहे. चाळीसगाव येथे शाळेत मुलाला शिक्षणासाठी दाखल केलेले होते. यामुळे मुलाला शाळेत सोडण्यासाठी दुचाकीने दसेगाव फाट्यावर यावे लागत होते. दरम्यान नेहमीप्रमाणे सुवर्णसिंग घोरपडे हे फाट्यावर आले असता मुलाला व्हॅनमध्ये बसवले. यानंतर ते घरी जाण्यासाठी निघाले.
दसेगाव फाट्याजवळ महामार्गाचे काम सुरू असल्याने एकमार्गी रस्त्यावर सुवर्णसिंग दुचाकीने जुने दसेगाव फाट्याकडे वळण घेत असतांना चाळीसगावकडून धुळ्याकडे जाणार्‍या दुचाकी चालकाने सुवर्णसिंग याच्या दुचाकीला मागून जोरदार धडक दिली. त्यात सुवर्णसिंग हा रस्त्यावर पडला.
दुचाकीने दिलेल्या धडकेत जबर मार लागल्याने नागरीकांनी आधी चाळीसगाव येथे खाजगी रूग्णालयात दाखल करण्यात आले. मात्र अधिक मार लागल्याने त्यास धुळे येथे दाखल करण्यात आले. मात्र उपचारादरम्यान त्याचा सहाव्या दिवशी मृत्यू झाला. यावेळी धडक देणारा दुचाकीस्वार दुचाकीसह पळून गेला. सदर घटना १ जूनला सकाळी साडेदहाच्या सुमारास घडली. या प्रकरणी फरार दुचाकी चालकाच्या विरोधात मेहूणबारे पोलीस स्टेशनला अपघाताचा गुन्हा दाखल करण्यात आला आहे.
