जळगाव तालुक्यातील आसोदा येथील घटना
जळगाव (प्रतिनिधी) : बोलण्यासाठी दिलेला मोबाईल फोडल्याचा जाब विचारल्याने दोन जणांनी तरुणासोबत वाद घालत त्याला शिवीगाळ केली. त्यानंतर त्यांनी धारदार चाकूसारख्या शस्त्राने तरुणावर वार करुन गंभीर जखमी केले. ही घटना सोमवार दि. ५ ऑगस्ट रोजी सायंकाळच्या सुमारास असोदा गावातील बस स्थानक परिसरात घडली. याप्रकरणी तालुका पोलीस ठाण्यात दोन जणांविरोधात गुन्हा दाखल करण्यात आला आहे.
जळगाव तालुक्यातील असोदा येथे योगेश उर्फ अमोल सोमा सपकाळे (वय २५) हा तरूण सोमवार दि. ५ ऑगस्ट रोजी आसोदा बसस्थानकाजवळ उभा होता. त्यावेळी गावातील कुणाल उर्फ दुंड्या (पुर्ण नाव माहित नाही) आणि जयेश विलास कोळी
रा. आसोदा हे योगेशजवळ आले. यातील कुणालने योगेशचा मोबाईल बोलण्यासाठी मागितला. त्यानुसार मोबाईल बोलण्यासाठी दिला.
बोलणे झाल्यानंतर योगेशने त्याचा मोबाईल परत मागितला. या रागातून कुणालने त्याचा मोबाईल जमिनीवर आपटून फोडला. तरुणाने फोडलेला मोबाईल भरून देण्याचे सांगितल्याने दोघांनी योगेशला शिवीगाळ करून चाकूने वार करून गंभीर जखमी केले. याप्रकरणी मंगळवार दि. ६ ऑगस्ट रोजी मध्यरात्री तालुका पोलीस ठाण्यात कुणाल उर्फ दुंड्या (पुर्ण नाव माहित नाही) आणि जयेश विलास कोळी दोन्ही रा. आसोदा यांच्यावर गुन्हा दाखल करण्यात आला आहे. पुढील तपास पोहेकॉ दिनेश चव्हाण हे करीत आहे.
