यावल येथील थरार, मायलेकांविरुद्ध गुन्हा दाखल
यावल (प्रतिनिधी) – येथील पोलीस स्टेशनमध्ये एका आई व मुलाने सरकारी कामात अडथळा आणून तेथे वस्तू फेकून देत पोलिसांना शिवीगाळ केली. तसेच पोलीस कॉन्स्टेबलला मारहाण करून खाली पाडले. याप्रकरणी यावल पोलीस स्टेशनला १५ जून रोजी रात्री ११ वाजेच्या दोघांवर गुन्हा दाखल करण्यात आला आहे.
याप्रकरणी अल्लाउद्दीन मुबारक तडवी (वय ३२, रा. गणपती नगर, यावल) यांनी फिर्याद दिली आहे. संशयित आरोपी सतीश उर्फ सुनील पांडुरंग अडकमोल व त्यांची आई सिंधूबाई अडकमोल (रा. मोहराळा ता. यावल) यांनी १५ जून रोजी रात्री ८. ३० वाजता यावल पोलीस स्टेशनला येऊन तेथे पोलिसांना शिवीगाळ केली. जोरजोरात टेबल ठोकला. तुम्ही पोलीस स्टेशनला कशी नोकरी करतात, तेच मी पाहतो अशी धमकी देऊन ठाणे अंमलदाराच्या बाजूच्या खुर्चीला लाथ मारून फेकून दिली.
त्यानंतर फिर्यादी अल्लाउद्दीन तडवी यांची गच्ची धरून पोटात बुक्का मारून खाली फेकून दिले. त्यात त्यांच्या कमरेला मुक्का मार लागला. त्याची आई सिंधूबाई हिने त्यास प्रोत्साहन देऊन पोलिसांना शिवीगाळ केली. फिर्यादी यांना शासकीय कर्तव्य करण्यापासून अडथळा निर्माण केला म्हणून यावल पोलीस स्टेशनला गुन्हा दाखल करण्यात आला आहे. तपास सपोनि विनोदकुमार गोसावी करीत आहेत.
