मुंबई ( प्रतिनिधी ) – एक्स-बॉयफ्रेण्ड सहकाऱ्याच्या हत्येच्या गुन्ह्यात तुरुंगात असलेल्या पनवेलची महिला कॉन्स्टेबल 29 वर्षीय शीतल पानसरे एका वरिष्ठ पोलीस निरीक्षकाचीही हत्या करण्याची योजना आखत होती. त्यासाठी दुसऱ्या पोलीस उपनिरीक्षकाच्या साथीने तिने हा कट रचल्याचा आरोप आहे. हत्येच्या कटात सहभागी आरोपी पोलीस उपनिरीक्षक मात्र फरार आहे.
नवी मुंबईतील नेहरु नगर पोलीस स्टेशनमध्ये कार्यरत शीतल पानसरे हत्येच्या गुन्ह्यात मुख्य संशयित आहे. नेहरु नगर पोलीस स्टेशनमध्येच कॉन्स्टेबल असलेल्या शिवाजी सानपचा ऑगस्ट महिन्यात हिट अँड रनमध्ये मृत्यू झाला. घरी जाताना शिवाजी सानपला नॅनो कारने धडक दिली होती.
शिवाजी सानपच्या मृत्यूला जबाबदार ड्रायव्हरचा शोध घेण्याचा प्रयत्न पोलिसांनी केला असता, शीतल पानसरेने ही योजना आखल्याचं समोर आलं. त्यानंतर सप्टेंबर महिन्यात तिला अटक करण्यात आली होती. आरोपी शीतल पानसरे आणि मयत शिवाजी सानप हे यापूर्वी रिलेशनशीपमध्ये होते.
शीतल पानसरेला मदत केल्याप्रकरणी पनवेल शहर पोलिसांनी आणखी दोघा जणांना अटक केली. त्याच पोलीस स्टेशनमधील पीएसआयही या कटात सामील असल्याचं तपासात उघडकीस आलं, मात्र तोपर्यंत पोलीस अधिकारी परागंदा झाला होता.
शीतल पानसरेच्या चौकशीत आणखी धक्कादायक खुलासा झाला. त्यांनी एका वरिष्ठ पोलीस निरीक्षकाच्या हत्येचाही प्लॅन आखला होता. “आम्ही तिच्याशी बोलून हत्येच्या कटाचं कारण जाणून घेतलं” अशी माहिती नवी मुंबईतील एका वरिष्ठ पोलीस अधिकाऱ्याने दिली. मात्र सुरक्षा आणि गोपनीयतेच्या कारणास्तव पोलिसांनी त्याचं नाव गुप्त राखलं आहे.
पानसरे आणि फरार पोलीस निरीक्षक यांची शिस्त आणि प्रशासकीय बाबींवरुन संबंधित वरिष्ठ पोलीस निरीक्षकाशी झटापट झाल्याचं सूत्रांनी सांगितलं. वरिष्ठांना दोघांविरुद्ध अहवाल देण्यास सांगण्यात आलं होतं. “आरोपींना शिवाजी सानपप्रमाणेच संबंधित वरिष्ठ पोलीस निरीक्षकाचाही रस्ता अपघातात मृत्यू घडवून आणायचा होता,” असं सूत्रांनी सांगितलं.
