जळगावच्या दक्षता पेट्रोल पंप येथील प्रकार, पोलिसांचा सावध पवित्रा
जळगाव प्रतिनिधी : पोलीस दलाच्या कल्याणकारी विभागामार्फत चालविल्या जाणाऱ्या ‘दक्षता’ पेट्रोल पंपावरील जमा झालेली लाखो-कोट्यवधींची रक्कम बँकेत जमा न करताच, जबाबदार पोलीस उपनिरीक्षक गेल्या चार दिवसांपासून बेपत्ता झाल्याचा धक्कादायक प्रकार समोर आला आहे. वाल्मीक मधुकर वाघ (५७, रा. साईनगर, निमखेडी शिवार) असे या बेपत्ता फौजदाराचे नाव आहे.
जळगाव शहर पोलीस दलाच्या वेलफेअर विभागाच्या वतीने जिल्हा पेठ परिसरात ‘दक्षता’ पेट्रोल पंप चालवला जातो. या पंपावर दररोज जमा होणारी रोकड विभागाच्या बँक खात्यात जमा करण्याची महत्त्वाची जबाबदारी उपनिरीक्षक वाल्मीक वाघ यांच्याकडे होती. मात्र, प्राथमिक माहितीनुसार गेल्या दोन ते तीन महिन्यांपासून पंपावर जमा झालेली मोठी रक्कम त्यांनी बँकेत भरलीच नसल्याचे समोर आले आहे.
दि.११ फेब्रुवारी रोजी वाघ यांनी आपण घरातून निघून जात असल्याचे आपल्या मुलाला कळवले आणि त्यानंतर ते बेपत्ता झाले. याप्रकरणी त्यांच्या मुलाने तालुका पोलीस ठाण्यात तक्रार दिली असून, पोलिसांनी बेपत्ता झाल्याची नोंद केली आहे. हा गैरव्यवहार नेमका किती रुपयांचा आहे, हे अद्याप अधिकृतपणे सांगण्यात आलेले नाही. मात्र, हा आकडा कोट्यवधींच्या घरात असण्याची शक्यता वर्तवण्यात येत आहे.
सध्या पोलीस प्रशासन या प्रकरणाचे ऑडिट करत असून, वाल्मीक वाघ यांचा शोध घेण्यासाठी पथके रवाना करण्यात आली आहेत. पोलीस दलातीलच एका जबाबदार अधिकाऱ्याने असा प्रकार केल्याने जिल्हा पोलीस दलात मोठी खळबळ उडाली आहे.
“पेट्रोल पंपावरील रकमेची जबाबदारी वाघ यांच्याकडे होती, मात्र ती बँकेत भरली गेली नसल्याचे दिसतेय. संबंधित व्यक्ती गेल्या चार दिवसांपासून बेपत्ता आहे. नेमकी रक्कम किती आहे, हे ऑडिट (लेखापरीक्षण) पूर्ण झाल्यानंतरच स्पष्ट होईल.”
— डॉ. महेश्वर रेड्डी, जिल्हा पोलीस अधीक्षक.
