जळगाव (प्रतिनिधी ) ;– जळगावकडून संभाजीनगरकडे जाणाऱ्या चार चाकी वाहनाने दुचाकीला मागील बाजूस जोरदार धडक दिली. यात दुचाकीस्वार भगवत गौड (वय 30 रा. ओडिसा) हा जागीच ठार झाल्याची घटना छत्रपती संभाजीनगर महामार्गावर वाकोद जवळ शनिवार दुपारी चार ते पाच वाजेदरम्यान घडली.
मोटारसायकल स्वार हा सॉ मिलवर काम करणारा मजूर असून शनिवार रोजी वाकोद येथील बाजार असल्याने बाजारात खरेदीसाठी जात असताना हा अपघात झाला. अपघातानंतर गाडी चालक तेथून पळ काढून वाकोद येथे वरखेडी रस्त्यात गाडी लावून पसार झाला.
पहुर पोलीसांनी घटनास्थळी धाव घेऊन मयताला उपजिल्हा रुग्णालय पहुर येथे रवाना केले. गाडीचा शोध घेतला असता ती वरखेडी तांडा रोडवर मिळून आल्याने तीला पहुर पोलीस स्टेशन येथे लावण्यात आले. रात्री उशिरापर्यंत गुन्हा दाखल करण्याचे काम सुरू होते.
