तिघांना वाचविण्यात यश ; बुडालेल्या तरुणाचा शोध सुरु
सर्व जळगावच्या शिवाजी नाग परिसरातील मिथिला सोसायटीतील रहिवासी
जळगाव (प्रतिनिधी) : कांताई बंधाराजवळ असलेल्या नागाई जोगाई मंदिराजवळ गिरणा नदी पात्रात फिरण्यासाठी गेलेल्या तरुणांपैकी एक १७ वर्षीय तरुण पाण्यामध्ये वाहून गेला आहे. त्याचा मृतदेह शोधण्याचे काम युद्ध पातळीवर प्रशासनाकडून सुरू आहे. फोटो काढण्याच्या नादात त्यांचा तोल जाऊन ते पाण्यात पडले. इतर जण त्यांना वाचवत असताना मात्र हा १७ वर्ष तरुण पुराच्या पाण्यात वाहून गेला आहे.
शिवाजीनगर येथील दूध फेडरेशन जवळ असलेल्या मिथिला सोसायटी येथील १२ ते १४ तरुण हे सहलीसाठी कांताई बंधारा जवळ असलेल्या नागाई जोगाई मंदिर परिसरातील गिरणा नदीच्या पात्राजवळ गेले होते. या ठिकाणी १२ वाजेच्या सुमारास फोटो काढण्यासाठी योगिता दामू पाटील (वय २०), सागर दामू पाटील (वय २४), समीक्षा विपिन शिरोडकर (वय १७), नयन योगेश निंबाळकर (वय १७) हे नदीच्या काठाजवळ गेले होते. त्या ठिकाणी फोटो काढत असताना त्यांचा पाय घसरला. ते पाण्यात पडले. ते पाहून उपस्थित इतर तरुणांनी त्यांना वाचविण्यासाठी धाव घेतली. यावेळी योगिता, सागर आणि समीक्षा या तरुणांना बाहेर काढण्यात यश आले. मात्र नयन निंबाळकर हा वाहत्या पाण्यामध्ये वाहून गेला. त्याचा शोध घेता तो मिळून आला नाही. संध्याकाळी ५ वाजेपर्यंत प्रशासन त्याचा शोध घेत होते. घटनास्थळी नागरिकांनी मोठी गर्दी केली आहे.घटनास्थळी जळगाव तालुका पोलीस स्टेशनचे हेड कॉनस्टेबल अनील तायडे ,*ज्ञानेश्वर कोळी, मिथुन पाटिल, भुषण सपकाळेयांच्यासह महापालिका प्रशासन युद्धपातळीवर वाहून गेलेल्या युवकाचा शोध घेत आहे. खाजगी रुग्णालयात दाखल करण्यात आले जखमी तिघही तरुणांची चौकशी करण्यासाठी शहराचे आमदार राजुमामा भोळे यांनी खाजगी हॉस्पिटलमध्ये जाऊन भेट घेत त्यांच्या प्रकृतीची विचारपूस केली. यावेळी त्यांच्या पालकांना धीर दिला.
