जळगाव तालुक्यातील शिरसोली परिसरातील नेवरे शिवारातील घटना
जळगाव (प्रतिनिधी) : तालुक्यातील शिरसोली येथील नेवरे परिसरात असणाऱ्या नेवरे धरणामध्ये मित्रांसोबत पोहण्यास गेलेल्या तरुणाचा पाण्याचा अंदाज न आल्याने बुडून मृत्यू झाल्याची धक्कादायक घटना बुधवार दि. १५ ऑक्टोबर रोजी १० वाजेच्या सुमारास उघडकीस आली आहे. याप्रकरणी एमआयडीसी पोलीस स्टेशनला अकस्मात मृत्यूची नोंद घेण्याचे काम सुरू होते.
शरद राजाराम सुने (बारी, वय ३१, रा.शिरसोली प्र. न.)असे मयत तरुणाचे नाव आहे. त्याच्यापेक्षा आई-वडील असा परिवार आहे. तो एकुलता एक मुलगा होता. मजुरी करून तो परिवाराचा उदरनिर्वाह करीत होता. दरम्यान बुधवारी दि. १५ ऑक्टोबर रोजी सकाळी साडेनऊ वाजता तो गावातील मित्र भिका वसंत शिंपी (वय ४५), अशोक सखाराम भिल (वय ५०) यांच्यासोबत पोहण्यासाठी नेव्हरे शिवारातील नेव्हरे धरणात गेला होता. त्या ठिकाणी पोहत असताना पाण्याचा अंदाज न आल्याने शरद हा बुडायला लागला.
त्यावेळेला घाबरल्याने भिका शिंपी आणि अशोक भील गावाकडे धावले. त्यांनी पोलीस पाटील श्रीकृष्ण बारी यांना खबर दिली. ग्रामस्थ धरणाकडे आले यानंतर पट्टीच्या पोहणाऱ्यांच्या मदतीने शरद सुने याला बाहेर काढण्यात आले. शासकीय वैद्यकीय महाविद्यालय व रुग्णालयात शरद सुने याला दाखल केले असता तेथे वैद्यकीय अधिकाऱ्यांनी तपासून मयत घोषित केले. यावेळेला शरद सुने यांच्या परिवाराने तसेच मित्रांनी आक्रोश केला.
घटनेमुळे शिरसोली गावामध्ये शोककळा पसरली आहे. घटनेची एमआयडीसी पोलीस स्टेशनला नोंद घेण्याचे काम सुरू होते.
