गुन्हा नोंद न होण्यासाठी मागितली २० हजारांची लाच, हवालदारावर गुन्हा दाखल
रावेर तालुक्यातील निंभोरा येथे एसीबीकडून गुन्हा दाखल
जळगाव (प्रतिनिधी) : शेतकऱ्यांनी दिलेल्या तक्रार अर्जावर गुन्हा दाखल होऊ नये यासाठी हवालदाराने २० हजार रुपयांची लाच मागितली होती. ही गोष्ट निष्पन्न झाल्याने लाचलूचपत प्रतिबंधक विभागाकडून रावेर पोलीस स्टेशन येथे गुन्हा दाखल करण्यात आला आहे.
सुरेश पवार असे गुन्हा दाखल झालेले हवालदाराचे नाव आहे. यातील तक्रारदार यांनी शेतकरी यांच्याकडून १ लाख २७ हजार रुपये किमतीचा केळीचा माल घेऊन तो दिल्ली येथील व्यापारी यांना विकला होता. परंतु सदर मालाचे पैसे शेतकऱ्यांना दिले नाही म्हणून त्यांनी तक्रारदार यांचेविरुद्ध तक्रार अर्ज केला होता. त्याप्रमाणे हवालदार सुरेश पवार यांनी तक्रारदार यांना तक्रार अर्जाची चौकशी कामे निंभोरा पोलीस स्टेशन येथे बोलवले होते.
परंतु सुरेश पवार यांनी तक्रारदार यांच्याकडे तक्रार अर्जात नमूद केलेल्या रकमेच्या १० टक्के प्रमाणे लाच रक्कम मागितली अशी तक्रार दि.०७ ऑक्टोबर रोजी लाचलुचपत प्रतिबंधक विभाग, जळगांवकडे दिली होती. तक्रारदार यांच्या तक्रारीच्या अनुषंगाने दि.०७ रोजी पंचासमक्ष लाच मागणी पडताळणी कार्यवाही तपासली असता यातील सुरेश पवार यांनी तक्रारदार यांच्या विरुद्ध दाखल अर्ज चौकशीमध्ये गुन्हा नोंद न करण्यासाठी, त्यांना अर्ज चौकशीकामी योग्य ती मदत करण्याची मोबदल्यात तक्रारदार यांच्याकडे निंभोरा पोलीस स्टेशनचे प्रभारी अधिकारी यांना पैसे द्यावे लागतील असे सांगून २० हजार रुपये लाचेची मागणी केली आहे. म्हणून त्यांचे विरुद्ध लाच मागणीचा गुन्हा दाखल करण्यात आला आहे.
सदर कारवाई ही योगेश ठाकुर, पोलीस उप अधिक्षक स. फौज. दिनेशसिंग पाटील, पोहेकॉ/ किशोर महाजन, मपोहेकॉ/संगीता पवार, पोकों/राकेश दुसाने, पोकों/अमोल सुर्यवंशी, पोकों/भुषण पाटील यांनी केली आहे.
