कोईम्बतूर ( वृत्तसंस्था ) – देशाच्या तिन्ही सैन्यदलांचे प्रमुख बिपीन रावत यांचं तामिळनाडूमध्ये झालेल्या हेलिकॉप्टर दुर्घटनेमध्ये निधन झाल्याचं स्पष्ट झालं आहे.
आज दुपारी तामिळनाडूच्या कुन्नूर भागात भारतीय वायुदलाचं एमआय १७ ५ व्ही हे अत्याधुनिक हेलिकॉप्टर कोसळले. डोंगरी भागात हे हेलिकॉप्टर कोसळल्यानंतर तिथे तातडीने बचाव कार्य सुरू करण्यात आलं. अपघातात बिपीन रावत गंभीर जखमी झाले होते. त्यांना तातडीने रुग्णालयात दाखल करण्यात आलं. मात्र, उपचारांदरम्यान त्यांचं निधन झाल्याची माहिती समोर आली आहे. भारतीय हवाई दलाने त्यांच्या ट्विटर हँडलवरून ट्वीट करून माहिती दिली आहे.
तामिळनाडूच्या कोइम्बतूर आणि सुलूरदरम्यानच्या कुन्नूर या ठिकाणी हा अपघात झाला. इथल्या निलगिरीच्या डोंगळाळ प्रदेशामध्ये हे हेलिकॉप्टर कोसळलं. हेलिकॉप्टरमध्ये १४ जण प्रवास करत होते. लष्कराच्या काही वरीष्ठ अधिकाऱ्यांचादेखील समावेश होता. तिन्ही सैन्यदलांचे प्रमुख बिपीन रावत आणि त्यांच्या पत्नी मधुलिका रावत हे या हेलिकॉप्टरमध्ये होते. हेलिकॉप्टर अपघातात सर्व प्रवाशांचा मृत्यू झाल्याचं समोर आल्यामुळे रावत यांच्या पत्नीचंही या अपघातात निधन झाल्याचं स्पष्ट झालं आहे.
घटनास्थळावरून ११ जणांचे मृतदेह बाहेर काढण्यात आले उरलेल्या ३ जणांची प्रकृती गंभीर सांगितली जात होती. जखमी झालेल्या व्यक्ती ८० टक्क्यांहून जास्त प्रमाणात भाजल्याची देखील माहिती समोर आली होती. बिपीन रावत यांच्यावर देखील उपचार सुरू होते. मात्र, उपचारांदरम्यान त्यांचं निधन झाल्याचं अखेर जाहीर करण्यात आलं आहे.
हेलिकॉप्टरमधील १४ पैकी १३ व्यक्तींचं निधन झाल्याचं समोर आलं आहे. ग्रुप कॅप्टन वरुण सिंह हे जखमी असून त्यांच्यावर वेलिंग्टन येथील लष्कराच्या रुग्णालयात उपचार सुरू असल्याची माहिती भारतीय वायुदलाकडून देण्यात आली आहे.
