सोयगाव (प्रतिनिधी) : तालुक्यातील गिरडा घाटात मागील काही दिवसापासून बिबट्याचा मुक्त संचार सुरु आहे. याच दरम्यान गिरडा घाटात बिबट्याच्या हल्ल्यात शेतकऱ्याचा मृत्यू झाल्याची घटना घडली.
सुनील सुभाष जाधव असे या ठार झालेल्या शेतकऱ्याचे नाव आहे. शेतीची राखण करण्याकरिता हा शेतकरी शेतात गेला होता. या वेळी बिबट्याने त्यांच्यावर हल्ला केला आणि जवळपास ४० ते ५० फूट खोल दरीत नेत त्यांचे लचके तोडून त्यांना ठार केले. मागील काही दिवसापासून या भागात बिबट्याचा मुक्त संचार वाढल्याने नागरिकांमध्ये भीतीचे वातावरण पसरले असून वन विभागाने तात्काळ गस्त घालून बिबट्याला जेरबंद करावे अशी मागणी होत आहे.
