नंदुरबार जिल्हा रुग्णालयात सुरू होते उपचार
जळगाव (प्रतिनिधी) : भुसावळ येथील संतोष बारसे व सुनील राखुंडे हत्या प्रकरणातील संशयित आरोपी नितीन जगदीश फतरे याचा उपचारदरम्यान नंदुरबार जिल्हा रुग्णालयामध्ये मृत्यू झाल्याची माहिती मिळाली आहे. याप्रकरणी जळगाव पोलीस माहिती घेत होते.
भुसावळ येथे संतोष बारसे व सुनील राखुंडे यांचा कारमधून जात असताना अज्ञात हल्लेखोरानी गोळीबार करून खून केला होता. याप्रकरणी दाखल गुन्ह्यात संशयित आरोपी नितीन फतरे याला अटक करण्यात आली होती. भुसावळ बाजारपेठ पोलीस स्टेशनला गुन्हा दाखल करण्यात आला होता. सदरहू घटनेमध्ये सात ते आठ आरोपी अटक करण्यात आलेले आहे. यातील काही संशयित आरोपींना जळगाव जिल्हा कारागृहातून नंदुरबार जिल्हा कारागृहात २९ जून रोजी हलवण्यात आले होते.
दरम्यान नितीन जगदीश फतरे (वय २४, रा. वाल्मिक नगर, भुसावळ) याची प्रकृती खराब झाल्यानंतर त्याला दिनांक ५ सप्टेंबर रोजी नंदुरबार येथील जिल्हा सामान्य रुग्णालयात अतिदक्षता विभागात दाखल करण्यात आले होते. तेथे त्याच्यावर उपचार सुरू असताना शनिवार दि. १४ सप्टेंबर रोजी सकाळी ७ वाजेच्या सुमारास मृत्यू झाला आहे. याबाबत नंदुरबार जिल्हा कारागृहात नोंद करण्यात आली असून जळगाव जिल्हा पोलीस माहिती घेत होते.
