‘जिमी जोसेफ’ नावाच्या भामट्याने १० हजारांचा गंडा; १० महिन्यांनंतर गुन्हा दाखल
पोलीस सूत्रांकडून मिळालेल्या माहितीनुसार, ॲड. संजय व्ही. तेलगोटे (वय ५८, रा. संतधाम, दुर्गा कॉलनी, जामनेर रोड, भुसावळ) यांच्यासोबत हा प्रकार घडला. १७ जुलै २०२५ रोजी दुपारी दोन वाजेच्या सुमारास ‘जिमी जोसेफ’ नाव सांगणाऱ्या एका अज्ञात व्यक्तीने त्यांच्याशी संपर्क साधला. काही तांत्रिक अडचण असल्याचे भासवत तसेच विविध आमिषे दाखवत संबंधिताने ॲड. तेलगोटे यांची दिशाभूल केली.
त्यानंतर संशयिताने ऑनलाईन व्यवहाराच्या माध्यमातून त्यांच्या खात्यातून १० हजार रुपये स्वतःच्या खात्यावर वळवून घेतल्याचा आरोप आहे. फसवणुकीची बाब लक्षात आल्यानंतर ॲड. तेलगोटे यांनी विविध स्तरांवर पाठपुरावा केला. मात्र अपेक्षित प्रतिसाद न मिळाल्याने अखेर त्यांनी पोलिसांत धाव घेत तक्रार दाखल केली.
या तक्रारीवरून २७ मे २०२६ रोजी रात्री ९.०३ वाजता भुसावळ बाजारपेठ पोलीस ठाण्यात डायरी नोंद क्रमांक ३८ अन्वये भारतीय न्याय संहिता कलम ३१८(४) अंतर्गत गुन्हा दाखल करण्यात आला आहे. संशयित ‘जिमी जोसेफ’ याचा संपूर्ण पत्ता अद्याप समोर आलेला नसून पोलीस त्याचा शोध घेत आहेत.
दरम्यान, ऑनलाईन व्यवहारांचा तांत्रिक मागोवा घेण्यासाठी पोलिसांनी सायबर सेलची मदत घेतली आहे. भुसावळ बाजारपेठ पोलीस ठाण्याचे पोलीस निरीक्षक राहुल वाघ यांच्या मार्गदर्शनाखाली पोलीस अंमलदार जितेंद्र लोटू पाटील पुढील तपास करीत आहेत.
