पोलीस संशयितांच्या मागावर
भुसावळ (प्रतिनिधी) : शहरातील राष्ट्रीय महामार्गावरील नवोदय विद्यालयामागील शेतात १२ वर्षीय अल्पवयीन बालकाचा नग्न अवस्थेतील कुजलेला मृतदेह गुरुवार दि. १८ रोजी सकाळी आढळला होता. शवविच्छेदन अहवालाअंती अज्ञाताविरोधात भुसावळ तालुका पोलिसात खुनाचा गुन्हा दाखल करण्यात आला होता. आता या बालकाची ओळख पटली असून सदर मुलगा हा भिक्षेकरी परिवारातील असल्याची माहिती मिळाली आहे.
अनिल कैलास आव्हाड (वय १२, रेल्वे लोखंडी पुलाजवळ, भुसावळ) असे खुन झालेल्या बालकाचे नाव निष्पन्न झाले आहे. अनिल हा आपल्या परिवारासह स्टेशन परिसरात भिक्षा मागून उदरनिर्वाह करीत होता. (केसीएन)मात्र या बालकाचा खून कुणी व का केला? याचा शोध घेण्याचे आव्हान यंत्रणेपुढे आहे. भुसावळ तालुका पोलीस स्टेशनचे निरीक्षक महेश गायकवाड यांच्या मार्गदर्शनाखाली तपास सुरु आहे.
दरम्यान, खूनप्रकरणी एक संशयित आरोपी निष्पन्न करण्यात आला असून त्याच्या मागावर पोलीस आहेत. त्याला ताब्यात घेतल्यावर खरी माहिती समोर येऊ शकते अशी माहिती पोलीस सूत्रांनी दिली आहे.