चालकाच्या प्रसंगावधानाने ८० प्रवाशांचे वाचले प्राण ; भडगाव तालुक्यातील कजगाव येथील घटना
भडगाव (प्रतिनिधी) : मलकापूर ते विठ्ठलवाडी या धावत्या एस. टी. बसचे मागील एक चाक निखळले तर दुसऱ्या चाकाचे टायर फुटल्याने ही बस रस्त्याच्या कडेला असलेल्या खड्ड्यात जाताजाता वाचली. ही घटना कजगाव जवळ घडली. बस मधील ८० प्रवाशांनी सुटकेचा निःश्वास सोडला. तर प्रवाशांनी बस चालकाचे आभार मानले.
मलकापूर ते विठ्ठलवाडी जाणारी एस. टी. बस (एमएच- २०, बीएल ३२९६) ही पावणेबारा वाजेदरम्यान कजगाव ते भडगाव मार्गावरील साईबाबा मंदिराजवळ आल्यानंतर धावत्या बसचे मागील एक चाक निखळून पडले. तर लगेचच दुसऱ्या चाकाचे टायर फुटले,. यामुळे बस चालकाचे बसवरील नियंत्रण सुटल्याने बस एका बाजूला धावू लागली. परंतु, चालकाने समय सूचकता दाखवत बस थांबवली. बस एका बाजूला झुकताच प्रवाशांचा आक्रोश व रडारड सुरु झाली होती. परंतु, बस थांबताच प्रवाशी काही मिनिटातच खाली उत्तरले.
खाली उतरल्यावर त्यांनी सुटकेचा नि:श्वास टाकला. सोबतच चालकाचेही त्यांनी आभार मानले. काही वेळानंतर वाहक व चालक यांनी भडगावकडून येणाऱ्या बसमध्ये पुढील प्रवासासाठी या प्रवाशांना मार्गस्थ केले. भडगाववरून कजगावच्या दिशेने निघालेली बस कजगावपासून एक किलोमिटर अंतरावर असाताना बसचे एक चाक निखळले, तर दुसऱ्या चाकाचे टायर फुटल्याने बसने जोरात हेलकावा घेतला. यातच बसवरील नियंत्रण सुटत असतानाच बस थांबवण्यासाठी प्रयत्न केले. परंतु, बस बाजूलाच असलेल्या खड्ड्यात जाताजाता वाचल्याने बसमधील ७७ प्रवाशांसह वाहक जी. एम. राठोड व माझे प्राण वाचले, अशी प्रतिक्रिया चालक संजय खराडे यांनी दिली आहे.
