जळगावात अधिकारी असल्याचे सांगून ऑनलाईन गंडा
जळगाव (प्रतिनिधी) : एका भामट्याने स्टेट बँक ऑफ इंडियाच्या क्रेडिट कार्ड विभागातून बोलत असल्याचे भासवून शहरातील एका तरुण नोकरदाराला १ लाख ३२ हजार रुपयांचा ऑनलाईन गंडा घातल्याची घटना उघडकीस आली आहे. याबाबत जळगाव तालुका पोलीस स्टेशनला गुन्हा दाखल करण्यात आला आहे.
शहरातील निमखेडी रोड, शिवधाम मंदिर परिसरात राहणारे प्रणेश प्रकाश ठाकुर (वय ३४) यांनी याबाबत पोलिसांत तक्रार दाखल केली आहे. दि. २५ सप्टेंबर रोजी दुपारी साडेबारा वाजता ही घटना घडली. फिर्यादी प्रणेश ठाकुर यांना ८७२००६७३०७ या मोबाईल क्रमांकावरून एका व्यक्तीचा कॉल आला. कॉल करणाऱ्याने आपण स्टेट बँक ऑफ इंडियाच्या क्रेडिट कार्ड विभागातून बोलत असल्याचे सांगितले आणि फिर्यादीकडे त्यांच्या क्रेडिट कार्डासंबंधी काही माहिती विचारण्याचा प्रयत्न केला. प्रणेश ठाकुर यांनी आपली कोणतीही गोपनीय माहिती त्या व्यक्तीला दिली नाही. मात्र तरीही संशयिताने क्रेडिट कार्डमधून १ लाख ३२ हजार रुपयांची रक्कम काढून घेतली आणि त्यांची आर्थिक फसवणूक केली. या प्रकरणी प्रणेश ठाकूर यांच्या फिर्यादीवरुन अज्ञाताविरुद्ध जळगाव तालुका पोलीस ठाण्यात गुन्हा दाखल करण्यात आला आहे.
