जळगाव (प्रतिनिधी)– कर्नाटक राज्यातून ट्रकमध्ये आणलेला माल जळगावात रिकामा झाल्यावर एका पेट्रोलपंपावर मुक्कामाला असलेल्या ट्रकवरील क्लिनरचा हृदयविकाराच्या झटक्याने मृत्यू झाल्याची घटना रविवारी 25 रोजी मध्यरात्री घडली. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
लंकेश अंबराया कोटारगी (वय-२६, रा. दस्तापूर ता.जि. गुलबर्गा, कर्नाटक) हा ट्रकवर क्लिनर म्हणून कामाला आहे. गेल्या आठ दिवसांपासून त्यांच्या छातात दुखत होते. मात्र त्याने याकडे दुर्लक्ष केले. त्रास होत असलेल्या अशाच परिस्थितीत तो क्लिनर म्हणुन कामावर असलेल्या ट्रान्सपोर्ट करणाऱ्या ट्रकच्या मालासोबतच जळगावात आला. जळगावात माल रिकामा केल्यानंतर दोन दिवसांनंतर पुन्हा येथून माल भरून कर्नाटकात घेऊन जायचे होते. यासाठी ट्रक चालकासह क्लिनर लंकेश हे दोघे जळगाव तालुक्यातील चिंचोली येथील पटेल या पेट्रोलपंपावर मुक्कामास थांबले. शनिवारी रात्री ११ वाजेच्या सुमारास अचानक उलटी होऊन लंकेशच्या छातीत त्रास व्हायला लागला. त्यास ट्रकचालकासह पेट्रोल पंपावरील कर्मचाऱ्यांनी तातडीने जळगाव शहरातील खासगी रुग्णालयात हलविले. रुग्णालयात उपचार सुरू असताना रात्री दोन वाजेच्या सुमारास लंकेशची प्राणज्योत मालवली. पोलीसांनी घटनास्थळी धाव घेवून लंकेशचा मृतदेह शवविच्छेदनासाठी जिल्हा रुग्णालयात हलविला. याबाबत लंकेशच्या कर्नाटकातील कुटुंबियांना माहिती देण्यात आली असून ते जळगावकडे येण्यास रवाना झाले आहेत. लंकेश यांच्या पश्चात दोन भाऊ आई वडील असा परिवार आहे. याप्रकरणी वैद्यकीय अधिकारी डॉ. अजय सोनवणे यांच्या खबरीवरून एमआयडीसी पोलिस ठाण्यात अकस्मात मृत्यू नोंद करण्यात आली. पुढील तपास पो.ना. महेंद्र गायकवाड, समाधान टहाकळे हे करीत आहे.
